ডিজিটেল ডেস্কঃ কৰণ জোহৰৰ পৰিচালিত ৰণবীৰ সিং আৰু আলিয়া ভাট অভিনীত ছবি ‘ৰকি ঔৰ ৰাণী কি প্ৰেম কাহানি’ অহা ২৮ জুলাইত মুক্তি পাব। এই মুহূৰ্তত সমগ্ৰ দেশতে ছবিখনৰ প্ৰচাৰত ব্যস্ত নায়ক-নায়িকাগৰাকী।
শেহতীয়াকৈ কৰণ, ৰণবীৰ আৰু আলিয়াই এক প্ৰচাৰ অনুষ্ঠানত আছিল। য'ত দৰ্শকৰ আসনত হাজাৰ হাজাৰ স্কুলীয়া ছাত্ৰ-ছাত্ৰী আছিল। তেওঁলোকৰ সৈতে হোৱা কথা-বতৰাত নায়িকাগৰাকীয়ে নিজৰ কন্যা ৰাহাৰ প্ৰসংগো উলিয়ায়।
২০২২ চনৰ নৱেম্বৰ মাহত আলিয়াই মাতৃ হৈছিল। নতুন প্ৰজন্মৰ বহু অভিনেতা তাৰকা সন্তান। সেয়ে অনুৰাগীসকলে ৰাহাইও অভিনয় কৰিব বুলিয়ে প্ৰত্যাশা কৰিছে। কিন্তু আলিয়াৰ ক্ষেত্ৰত এনে নহ’বও পাৰে। প্ৰচাৰৰ সময়ত অভিনেত্ৰীগৰাকীয়ে এক আভাস দিলে।
ছোৱালী ৰাহাৰ কথা কওঁতে আলিয়াই হাঁহি এটা মাৰি কয়, "মই মোৰ ছোৱালীজনীক বিজ্ঞানী হ'বলৈ কওঁ!" অৱশ্যে এই ভিডিঅ’টো ৰাজহুৱা হোৱাৰ পৰাই চৌদিশে চৰ্চা আৰম্ভ হৈছে।
