ডিজিটেল ডেস্কঃ উত্তৰাখণ্ডৰ কেদাৰনাথ মন্দিৰলৈ যাত্ৰা কৰা ঘোঁৰাক ভাং খুৱাই দিয়াৰ ঘটনাই এতিয়া তীব্ৰ প্ৰতিক্ৰিয়াৰ সৃষ্টি কৰিছে। আৰক্ষীয়ে ঘোঁৰাক বলপূৰ্বক ভাং সেৱন কৰোৱাৰ ঘটনা সন্দৰ্ভত এখন এজাহাৰ পঞ্জীয়ন কৰিছে। অভিযুক্ত দুজনৰ সন্ধানো চলি আছে বুলি আৰক্ষীয়ে প্ৰকাশ কৰিছে। কেইদিনমান আগতে কেদাৰনাথৰ এটা ভিডিঅ' পোহৰলৈ আহিছিল।
ভিডিঅ'টোত দুজন যুৱকে এটা ঘোঁৰাক বলপূৰ্বক ভাং খুৱাই থকা দেখা গৈছিল। ঘোঁৰাটোৱে অস্বস্তি অনুভৱ কৰাৰ পিছতো তেওঁলোকে সেই কাম কৰি গৈছিল। ভিডিঅ'টো ভাইৰেল হোৱাৰ লগে লগে পশুপ্ৰেমীসকলে অভিযুক্ত যুৱক দুজনৰ বিৰুদ্ধে ব্যৱস্থা গ্ৰহণৰ দাবীত সৰব হৈ পৰে।
যুৱক দুজনক গ্ৰেপ্তাৰ কৰাৰ দাবী জোৰদাৰ হৈ উঠাৰ সময়তে উত্তৰাখণ্ড আৰক্ষীয়ে অভিযান আৰম্ভ কৰিছে। উত্তৰাখণ্ড আৰক্ষীয়ে অৱশেষত এই সন্দৰ্ভত এটা গোচৰ ৰুজু কৰিছে। আৰক্ষীয়ে কৈছে যে অভিযুক্তক সোনকালেই গ্ৰেপ্তাৰ কৰা হ'ব। ৰুদ্ৰপ্ৰয়াগ আৰক্ষীৰ সূত্ৰই প্ৰকাশ কৰা মতে ঘোঁৰাটোৰ গৰাকীৰ বিৰুদ্ধেও এটা গোচৰ ৰুজু কৰা হৈছে।
ইয়াৰ উপৰি পশুৰ প্ৰতি নিষ্ঠুৰতা আইনৰ অধীনত ১৪ টা পৃথক গোচৰ ৰুজু কৰা হৈছে।বলীউডৰ অভিনেত্ৰী ৰবীনা টণ্ডনেও ঘটনাটোক লৈ মাত মাতিছে। তেওঁ ভিডিঅ'টো টুইট কৰি আৰু যুৱক দুজনক গ্ৰেপ্তাৰ কৰিবলৈ দাবী জনাইছে। ৰবীনাই ভিডিঅ'টোত উত্তৰাখণ্ডৰ মুখ্যমন্ত্ৰীক টেগ কৰি এনেদৰে লিখিছে-"আমি ধৰ্মীয় স্থানত ঘোঁৰাৰ ওপৰত এনে নিষ্ঠুৰতা বন্ধ কৰিব নোৱাৰোঁনে? এই লোকসকলে এনে কাম কৰি কেনে ধৰণৰ আনন্দ পায়?"
