ডিজিটেল ডেস্কঃ ভোটত হাৰিল এলন মাস্ক। এতিয়া টুইটাৰৰ পৰা পদত্যাগৰ সম্ভাৱনাই দেখা দিছে মাস্কৰ। কিন্তু কেনেকৈ?
দেওবাৰে আবেলি টুইটাৰত মাস্কে এটা প্ৰশ্নৰে সমীক্ষা চলাইছিল। এটা সহজ ভোটিং প্ৰক্ৰিয়াৰে চলোৱা সমীক্ষাটোত অংশগ্ৰহণকাৰীসকলে ‘হয়’ অথবা ‘নহয়’ ক’ব লাগে। প্ৰশ্নটো আছিল- টুইটাৰৰ চিইঅ’ পদৰ পৰা তেওঁ পদত্যাগ কৰা উচিত নেকি? প্ৰশ্নটোৰ স’তে তেওঁ লিখিছিল যে জনতাই যি উত্তৰ দিব,সেয়া আখৰে আখৰে পালন কৰিব।
২৪ ঘণ্টাৰ ভিতৰতে ১ কোটি ৭৫ লাখ ২ হাজাৰ ৩৯১ জন লোকে ভোট দিয়ে। ইয়াৰে ৫৭.৫ শতাংশই ভোট দিয়ে এলন মাস্কৰ বিৰুদ্ধে। অর্থাৎ অধিকাংশ ভোটাৰেই বিচাৰে যে টুইটাৰৰ নতুন মালিকে চিইঅ’ পদ ত্যাগ কৰা উচত। বাকী ৪২.৫ শতাংশই এলন মাস্কক চিইঅ’ হিচাপেই বিচাৰে।
ভোটৰ ফলাফলত দেখা গ’ল যে এলন মাস্কে নিজে পতা ফান্দৰে বলি হৈছে। অৰ্থাৎ তেওঁ হাৰিছে। কিন্তু এতিয়ালৈকে এলন মাস্কে পদত্যাগ সংক্ৰান্তীয় কোনো ঘোষণা কৰা নাই।
উল্লেখ্য যে গাড়ী প্ৰস্তুতকাৰী সংস্থা টেছলাৰ মুৰব্বী এলন মাস্কে টুইটাৰ ক্ৰয় কৰাৰ পাছতে কেইবাটাও বিতৰ্কত সোমাই পৰিছিল। টুইটাৰৰ কৰ্মচাৰীক বৰ্খাস্ত কৰাৰ পৰা ব্লু টিকলৈকে বিতৰ্কত জড়িত হৈ পৰে মাস্কে নিজে। তাৰপাছতে তেওঁৰ এই সমীক্ষাৰ ফলাফল ব্যাপক অৰ্থৱহ হৈ পৰিছে।
