ভুৱা পৰিচয় লৈ অসমত বাস কৰা এজন সন্দেহযুক্ত বাংলাদেশ নাগৰিক গ্ৰেপ্তাৰ

ঊৰ্ধ্ব অসমত ভুৱা পৰিচয় লৈ দীৰ্ঘদিন ধৰি বসবাস কৰি অহা এজন সন্দেহযুক্ত বাংলাদেশ নাগৰিকৰ ঘটনা পোহৰলৈ আহিছে। বুধবাৰে নিশা দেৰগাঁও আৰক্ষীয়ে চলোৱা এক অভিযানত আটক হয় এই ব্যক্তিজন। ১৯৯০ চনত বাংলাদেশত সংঘটিত এক অপৰাধমূলক ঘটনামূলক গোচৰৰ সৈতে তেওঁৰ জড়িত থকাৰ অভিযোগ উত্থাপিত হৈছে।

উপলব্ধ তথ্য অনুসৰি, মচুক মিয়া নামৰ লোকজন দেৰগাঁও থানাস্থিত নাৰাণীৰ ওচৰৰ মাজগাঁৱত বাস কৰিছিল আৰু কাঠৰ ব্যৱসায়ৰ সৈতে জড়িত আছিল। কিছুমান সজাগ নাগৰিকে প্ৰদান কৰা তথ্যৰ ভিত্তিত দেৰগাঁও থানাৰ ভাৰতপ্ৰাপ্ত বিষয়া বসন্ত শইকীয়াৰ নেতৃত্বত আৰক্ষীৰ এটা দলে সন্দেহযুক্ত ব্যক্তিসকলক আটক কৰি থানালৈ লৈ আহে আৰু জেৰা অব্যাহত ৰাখে।

গোলঘাটৰ জ্যেষ্ঠ আৰক্ষী অধীক্ষক স্বপ্ননীল ডেকাই সদৰী কৰা মতে, মচুক মিয়া ওৰফে মচুক আহমেদ নামৰ অভিযুক্তজনে নাম সলনি কৰি ফাৰুক আহমেদ নামৰ ভুৱা পৰিচয়েৰে অঞ্চলটোত আশ্ৰয় লৈছিল। অসমত বসবাস কৰাৰ সময়ত ভোটাৰ কাৰ্ড আৰু আধাৰ কাৰ্ডকে ধৰি কেইবাখনো গুৰুত্বপূৰ্ণ নথিপত্ৰত ভুৱা তথ্য ব্যৱহাৰ কৰাৰ সন্দেহ প্ৰকাশ কৰিছে আৰক্ষীয়ে।