ডিজিটেল ডেস্কঃ মটৰ দুৰ্ঘটনাৰ পাছতে ঋষভ পণ্টলৈ উদ্দেশ্যি মূল্যৱান পৰামৰ্শ প্ৰদান কৰিলে কপিল দেৱে। ভাৰতৰ বিশ্বকাপজয়ী অধিনায়কজনে পণ্টে নিজক গুৰুত্ব দিবলৈ আহ্বান জনাইছে।
এটা টিভি চেনেলৰ আগত কপিল দেৱে কয় যে সৰুকালতে তেওঁৰো এবাৰ দুৰ্ঘটনা হৈছিল। তাৰপাছৰে পৰা তেওঁ শিক্ষা লাভ কৰে।
''এইটো এটা শিক্ষাৰ বিষয়। অতি কম বয়সতে মটৰচাইকেল চলাবলৈ গৈ মোৰো এটা দুৰ্ঘটনা হৈছিল। তাৰপাছৰে পৰা দাদাই মোক মটৰচাইকেলত হাত দিবলৈ দিয়া নিদিলে। পণ্ট যে সুস্থভাৱে আছে, তাৰ বাবে ঈশ্বৰক ধন্যবাদ জনাওঁ।’’
''তোমাৰ খুব ভাল গাড়ী এখন থাকিব পাৰে। গাড়ীখন খুব তীব্ৰ গতিৰে চলে। কিন্তু তাৰপাছতো তুমি সতৰ্ক থকা উচিত। ইচ্ছা কৰিলেই তুমি এজন গাড়ীচালক ৰাখিব পাৰা।’’- কপিল দেৱে কয়- ''হ’ব পাৰে তোমাৰ গাড়ী চলোৱাটো এটা নিছা। কিন্তু তোমাৰ এটা দায়িত্ব আছে। দেশৰ প্ৰতি, তোমাৰ সংসাৰৰ প্ৰতি। তোমাৰ নিজৰ দায়িত্ব নিজেই ল’ব লাগিব। নিজৰ ভৱিষ্যত নিজে সুৰক্ষিত কৰিব লাগিব।’’
উল্লেখ্য যে ভয়াৱহ মটৰ দুৰ্ঘটনাত পতিত হোৱাৰ পাছত দেৰাডুনৰ মেক্স হস্পিতালত ভৰ্তি হৈ আছে টীম ইণ্ডিয়াৰ তাৰকা পণ্ঠ। শেহতীয়াকৈ তেওঁৰ শাৰীৰিক অৱস্থাৰ কিছু উন্নতি হোৱা বুলি চিকিৎসালয় কৰ্তৃপক্ষই জনাইছে। উন্নত চিকিৎসাৰ বাবে বিদেশলৈও নিব লগা হ’ব পাৰে তাৰকাজনক।
Continue Reading
