ডিজিটেল ডেস্কঃ ইণ্ডিয়ান প্ৰিমিয়াৰ লীগৰ আৰ্হিত প্ৰথমবাৰৰ বাবে অনুষ্ঠিত হ’বলগীয়া মহিলা প্ৰিমিয়াৰ লীগৰ নিলাম চলি আছে। মুম্বাইত চলি থকা এই নিলামত আজি দেশৰ লগতে কেইবাগৰাকীও তাৰকা ক্ৰিকেটাৰক কোটি টকাতকৈ অধিক দৰত চুক্তিবদ্ধ কৰিছে ফ্ৰেন্সাইজি সমূহে। নিলামত সৰ্বাধিক দৰ লাভ কৰিছে ভাৰতৰ তাৰকা বেটাৰ স্মৃতি মান্ধনাই।
নিলামত প্ৰথমগৰাকী খেলুৱৈ হিচাপে মান্ধনাক ৩.৪ কোটি টকাত ৰয়েল চেলেঞ্জাৰ্চ বাংগালুৰুৱে ক্ৰয় কৰে। মান্ধানাৰ পাছতে দ্বিতীয় সৰ্বাধিক দৰ লাভ কৰা অষ্ট্ৰেলিয়ান তাৰকা এছলি গাৰ্ডনাৰক গুজৰাট জায়েন্টছে আৰু ইংলেণ্ডৰ নাটালি চাইভাৰক মুম্বাই ইণ্ডিয়ানচে ৩.২ কোটি টকাত নিজ নিজ দলত চুক্তিবদ্ধ কৰে।
ভাৰতীয় অলৰাউণ্ডাৰ দিপ্তী শৰ্মাক ইউপি ৱাৰিৱৰ্জে ২.৬ টকাত ক্ৰয় কৰে। ইফালে কালি পাকিস্তানৰ বিপক্ষে ভাৰতৰ জয়ত মুখ্য ভূমিকা লোৱা জেমিমা ৰড্ৰিগুৱেজক দিল্লী কেপিটেলছে ২.২ কোটি টকাত চুক্তিবদ্ধ কৰে। ভাৰতীয় দলৰ অধিনায়ক হৰমনপ্ৰীত কৌৰক ১.৮ কোটি টকাত মুম্বাই ইণ্ডিয়ানচে ক্ৰয় কৰে।
ভাৰতৰ তাৰকা পেচাৰ ৰেণুকা সিঙক ৰয়েল চেলেঞ্জাৰ্চ বাংগালুৰুৱে ১.৫ কোটি টকাত, শেহতীয়াকৈ ১৯ অনুৰ্ধ বিশ্বকাপত ভাৰতক নেতৃত্ব দি খিতাপ জয় কৰা ভাৰতীয় দলৰ অপেনাৰ শ্বেফালী বাৰ্মাক ২ কোটি টকাত দিল্লী কেপিটেলছে ২ কোটি টকাত, পেচাৰ পূজা ভাষ্ট্ৰেকাৰক ১.৯ কোটি টকাত মুম্বাই ইণ্ডিয়ানচে ক্ৰয় কৰিছে।
আনহাতে ৰিচা ঘোষক বাংগালুৰুৱে ১.৯ কোটি টকাত, য়ষ্টিকা ভাটিয়াক ১.৫ কোটি টকাত মুম্বাই ইণ্ডিয়ানচে, অষ্ট্ৰেলিয়ান তাৰকা এলিছ পেৰীক বাংগালুৰুৱে ১.৭ কোটি টকাত, ইংলেণ্ডৰ ছফী এক্লেষ্টনক ১.৮ কোটি টকাত ইউপি ৱাৰিৱৰ্জ, বেথ মুনীক গুজৰাট জায়েন্টছে ২ কোটি টকাত ক্ৰয় কৰিছে।
এইসকলৰ উপৰিও দেশ তথা বহি:দেশৰ কেইবাগৰাকীও ক্ৰিকেটাৰ এইপৰ্যন্ত নিলামত বিক্ৰী হৈছে। উল্লেখ্য যে, উদ্বোধনী বৰ্ষৰ মহিলা প্ৰিমিয়াৰ লীগৰ খেলুৱৈ নিলামৰ বাবে মুঠ ১৫২৫ গৰাকী খেলুৱৈয়ে পঞ্জীয়ন কৰিছিল যদিও চূড়ান্ত তালিকাত ৪৪৯ গৰাকী খেলুৱৈক স্থান দিয়া হয়।
মূল তালিকাত থকা ৪৪৯ গৰাকী খেলুৱৈৰ ভিতৰত ২৪৬ গৰাকী ভাৰতীয় আৰু ১৬৩ গৰাকী বহিঃদেশৰ খেলুৱৈ। মুঠ পাঁচটা ফ্ৰেন্সাইজি ক্ৰমে ইউ পি ৱাৰিৱৰ্জ, দিল্লী কেপিটেলছ, গুজৰাট জায়েণ্টছ, মুম্বাই ইণ্ডিয়ানছ আৰু ৰয়েল চেলেঞ্জাৰছ বেংগালুৰুৱে খেলুৱৈ ক্ৰয়ৰ বাবে সৰ্বোচ্চ ১২ কোটি টকাকৈ বিনিয়োগ কৰিব পাৰিব।
নিলামত মুঠ ৯০ জন খেলুৱৈক নিলাম কৰা হ’ব। প্ৰতিটো ফ্ৰেঞ্চাইজিত নূন্যতম ১৫ গৰাকী আৰু সৰ্বাধিক ১৮ গৰাকী খেলুৱৈ থাকিব। নিলাম হ’বলগীয়া ৯০ গৰাকী খেলুৱৈৰ ভিতৰত ৩০ গৰাকী সহযোগী ৰাষ্ট্ৰকে ধৰি বহিঃদেশৰ খেলুৱৈৰ বাবে সংৰক্ষণ কৰা হৈছে।
Continue Reading
