ডিজিটেল ডেস্কঃ যোশীমঠৰ পিছত এইবাৰ উত্তৰ প্ৰদেশৰ আলিগড়ত মেলিছে বিশাল ফাঁট। 'স্মাৰ্ট চিটি মিছন'ৰ অধীনত আলিগড়ত মাটিৰ তলত পাইপ স্থাপনৰ কাম আৰম্ভ কৰা হৈছে। মাটিৰ তলৰ পাইপ ফাটি যোৱাৰ ফলতে পানী ওলাই আহিছে।ফলত স্থানীয় ভূমিৰ গাঁথনি সলনি হোৱাৰ বাবে বহু ঘৰত ফাঁট মেলিছে।
উত্তৰাখণ্ডৰ যোশীমঠক মাৰাত্মক ফাঁটৰ বাবে বসবাসৰ অযোগ্য বুলি ঘোষণা কৰা হৈছে। এইবাৰ উত্তৰ প্ৰদেশৰ আলিগড়ত একে ধৰণৰ ঘটনা ঘটিবলৈ লোৱাত স্থানীয় বাসিন্দাসকল আতংকিত হৈ পৰিছে। চহৰখনৰ কাৱাৰীগঞ্জ অঞ্চলত এনে আতংক বিয়পি পৰিছে । সেই ঠাইত এটাৰ পিছত আনটো ঘৰত ফাঁট মেলা দেখা গৈছে।
স্থানীয় বাসিন্দা শশীয়ে কয়, "আমি যোৱা কেইদিনমান ধৰি ঘৰত ফাঁট মেলা দেখি আহিছো। যোশীমঠৰ ঘটনাৰ পিছত, আমি ইয়াকে লৈ আতংকিত হৈ পৰিছো। পৌৰসভাৰ ওচৰত অভিযোগ দাখিল কৰা হৈছে। কিন্তু তেওঁলোকে একো কৰা নাই। আমি আশংকা কৰোঁ যে আমাৰ ঘৰবোৰো খহি পৰিব পাৰে। ''স্থানীয় সূত্ৰ অনুসৰি, সমস্যাটো এটা পাইপলাইন স্থাপনৰ পিছতে আৰম্ভ হৈছে। কেন্দ্ৰীয় চৰকাৰৰ 'স্মাৰ্ট চিটি মিছন'ৰ অধীনত, আলিগড়ত ভূগৰ্ভস্থ পাইপ স্থাপনৰ কাম কৰা হৈছে। মাটিৰ তলত পাইপ ফাটি গৈছে আৰু পানী ওলাই আহিছে। ফলস্বৰূপে ৰাস্তা, ঘৰ আজিত ফাঁট মেলিছে।
অতিৰিক্ত পৌৰ আয়ুক্ত ৰাকেশ কুমাৰ যাদৱে কৈছিল যে তেওঁ ঘটনাটোৰ বিষয়ে অৱগত হৈছে। পৌৰসভাই এটা দল সেই স্থানলৈ প্ৰেৰণ কৰিবলৈ সাজু হোৱা বুলি জানিব পৰা গৈছে।
Continue Reading
