যৌনসংগী বিচাৰি নিজৰ গুহাৰ পৰা উলাই গৈছিল মানুহৰ আদিম প্ৰজাতিৰ মহিলাসকল! নতুন গৱেষণাত দাবী কৰিলে গৱেষকে

ডিজিটেল ডেস্কঃ কেনেকুৱা আছিল মানুহৰ আদিম প্ৰজাতিসমূহৰ যৌনজীৱন? যৌনতা যিকোনো জীৱৰে সৃষ্টি আৰু আনন্দৰ মূল উৎস। তেনেস্থলত জানিবলৈ মন নাযায়নে আদিম মানুহে কেনেধৰণে যৌনতাৰ বহিঃপ্ৰকাশ কৰিছিল?

মানুহৰ আদিম প্ৰজাতিসমূহৰ এটা হৈছে নিয়েণ্ডাৰথেল। ইউৰোপৰ লোকসকলক এই নিয়েণ্ডাৰথেলৰ বংশধৰ বুলি কোৱা হয়। গৱেষকসকলৰ মতে, খ্ৰীষ্টপূৰ্ব ৪ লাখ ৩০ হাজাৰ বছৰ পূৰ্বতে নিয়েণ্ডাৰথেলসকল আছিল।

এই নিয়েণ্ডাৰথেৰসকলৰ যৌনজীৱনক লৈয়েই ১৯ অক্টোবৰত ‘নেচাৰ’ নামৰ এখন পত্ৰিকাত এক বিস্তৃত গৱেষণা পত্ৰ প্ৰকাশ পাইছে। গৱেষণাপত্ৰখনত ইউৰোপৰ কেইবাখনো আগশাৰীৰ বিশ্ববিদ্যালয়ৰ গৱেষকে তথ্য সন্নিৱিষ্ট কৰিছে।

তাত গৱেষকসকলে দাবী কৰিছে যে গুহাৰ ভিতৰত নিজৰ ঘনিষ্ঠসকলৰ স’তে বাৰে বাৰে যৌনসংগমত লিপ্ত হয় আদিম পুৰুষসকল। পুৰুষসকলে কেৱল নিজৰ গুহাৰ ভিতৰতহে যৌনসংগমত লিপ্ত হৈছিল।

পুৰুষসকলে গুহাৰ ভিতৰতে যৌনসংগম কৰাৰ বিপৰীতে নিজৰ গুহা এৰি আদিম মহিলাসকলে যৌনসংগী বিচাৰি ফুৰিছিল। তেনেদৰেই নিজৰ যৌনসংগী পচন্দ কৰি লৈছিল মহিলাসকলে।

গৱেষকসকলে দাবী কৰিছে যে ৰাছিয়াৰ দক্ষিণ চাইবেৰিয়াৰ পৰা ১৩টা নিয়েণ্ডাৰথেলৰ ডিএনএ উদ্ধাৰ হৈছে। সেই ডিএনএৰ পৰাই এই তথ্য পোৱা গৈছে।

গৱেষণাপত্ৰখনত উল্লেখ কৰা হৈছে নিয়েণ্ডাৰথেলে আন এটা প্ৰজাতি হোমো চেপিয়েন্সৰ স’তেও যৌনসংগমত লিপ্ত হৈছিল।

যৌনজীৱনৰ উপৰিও আদিম নিয়েণ্ডাৰথেলসকলৰ সামাজিক জীৱনৰ বিষয়েও গৱেষণাপত্ৰখনত নতুন তথ্য দিয়া হৈছে।

গৱেষণাপত্ৰখন প্ৰকাশ হোৱাৰ পাছতে ইয়াক লৈ বিজ্ঞানীমহলৰ মাজত তীব্ৰ চৰ্চা চলিছে। বিজ্ঞানীসকলে কয় যে আদিম মানুহৰ এটা উপপ্ৰজাতি হিচাপে নিয়েণ্ডাৰথেলক বুজিবলৈ গৱেষণাপত্ৰখনে সুবিধা কৰি দিছে।