সেমেকা মন, সেমেকা দুচকু; ‘হিয়াৰ আমঠু’ অবিহনে আজি প্ৰথমটো জন্মদিন উদযাপন অসমীয়াৰ

ডিজিটেল ডেস্কঃ আজি অসমীয়াৰ হিয়াৰ আমঠু, প্ৰাণৰ শিল্পী জুবিন গাৰ্গৰ জন্মদিন। জুবিন গাৰ্গ নাই, সেই কথা আজিও মানি লব পৰা নাই অসমীয়া ৰাইজে। জুবিনৰ কায়িক অনুপস্থিতিত প্ৰথমটো জন্মদিন পালন কৰিছে অসমীয়াই। এই সময়ত আৱেগিক হৈ পৰিছে সকলো।

মহানায়ক জুবিন গাৰ্গৰ মহাপ্ৰয়াণৰ পিচত প্ৰথমটো জন্মদিন উদযাপন কৰি দুখত কাতৰ হৈছে ৰাজ্যবাসী ।‌ দুখৰ চকুলোৰে প্ৰিয় শিল্পীৰ জন্মদিন পালন কৰিছে লাখ লাখ জুবিন অনুৰাগীয়ে । নিশাৰে ১২ বজাৰে পৰা জুবিন ক্ষেত্ৰত ভিৰ কৰিছেহি অনুৰাগীয়ে। পুৱাও ভিন্ন ঠাইৰ পৰা আহি জুবিনক্ষেত্ৰলৈ আহিল বহু সংখ্যক অনুৰাগী।

৫৩ সংখ্যক জন্মদিন আজি প্ৰাণৰ শিল্পীগৰাকীৰ। জুবিন গাৰ্গৰ কাহিলীপাৰাস্থিত বাসগৃহত অনুৰাগীৰ ভিৰ। নিশা সোণাপুৰৰ জুবিনক্ষেত্ৰতো অনুৰাগীৰ ভিৰ। কেক কাটি প্ৰাণৰ শিল্পীগৰাকীৰ জন্মদিন পালন কৰি গালে ‘মায়াবিনী ৰাতি… ‘। সোণাপুৰত নিশা ‘জয় জুবিন দা’, ‘We Want Justice’ শ্ল’গান জুবিন অনুৰাগীৰ।

মৰমৰ গল্ডীক সুঁৱৰি উচুপি উঠিল গৰিমা শইকীয়া গাৰ্গ, আৱেগিক হৈ পৰিল পিতৃও। দবা-শংখ, নাম-প্ৰসংগ, দিহানামেৰে মুখৰিত হৈ পৰিল কাহিলীপাৰাৰ বাসগৃহ। জুবিনগাৰ্গৰ কাহিলীপাৰাস্থিত বাসগৃহত ২০ কেজি ওজনৰ কেক কাটি পালন কৰা হয় জন্মদিন। জুবিন গাৰ্গ ফেন ক্লাবেও উদযাপন কৰিলে প্ৰিয় শিল্পীৰ ওপজা দিন। কাহিলীপাৰাৰ বাসগৃহত জুবিন ফেন ক্লাবৰ সৈতে গৰিমা গাৰ্গে কান্দি কান্দি কাটিলে কেক।

প্রাণৰ শিল্পীগৰাকীৰ অনুপস্থিতিত তেওঁৰ আজি প্রথমটো জন্মদিন। ৰাজ্যজুৰি গুণমুগ্ধই পালন কৰিছে মহানায়ক জুবিন গাৰ্গৰ ওপজা দিন। গীতে-মাতে সকলোৱে সোঁৱৰণ কৰিছে জুবিন গাৰ্গক। ঠায়ে ঠায়ে লোৱা হৈছে ভিন্ন জনকল্যাণমূলক কাৰ্যসূচী। সৃষ্টিমূলক কৰ্মৰাজিৰেও সোঁৱৰণ হিয়াৰ আমঠুক। বিজেপিও আজি ৰক্তদান শিবিৰ আয়োজন কৰিছে।

জুবিন গাৰ্গ য'তে আছে কুশলে থাকক.. শান্তিত থাকক।