ডিজিটেল ডেস্কঃ সাধাৰণতে ‘মেদবহুলতা’ আৰু ‘উচ্চ কলেষ্টেৰল’ৰ বাবে হাৰ্ট এটেক হোৱা দেখা যায়। কিন্তু কিছুদিনৰ পৰা যুৱক-যুৱতীসকলৰ মাজত হাৰ্ট এটেকৰ সংখ্যা বাঢ়িছে, যুৱচামৰ অনেক জনেই হাৰ্ট এটেকৰ বাবে মৃত্যুক আঁকোৱালি লৈছে। এনে বহুকেইটা হাৰ্ট এটেকৰ খবৰ পোৱাৰ পাছত যুৱক-যুৱতীৰ মাজত ভয় ভাৱৰ সৃষ্টি হৈছে। খোজ কঢ়া, জিমত ব্যায়াম কৰা, নৃত্য কৰা আদি দৈনন্দিন কাম-কাজ কৰা লোকসকল হাৰ্ট এটেকৰ বলি হোৱা দেখা গৈছে। হৃদযন্ত্ৰ বিশেষজ্ঞসকলে এই বিষয়ে কি কয় জানো আহক।
বৃদ্ধি পাইছে হাৰ্ট এটেকৰ ৰোগী
যোৱা কেইবছৰমানৰ পৰা বিশেষকৈ ২৫ৰ পৰা ৫০ বছৰ বয়সৰ লোকৰ মাজত হাৰ্ট এটেকৰ প্ৰাদুৰ্ভাৱ বাঢ়িছে। শেহতীয়াকৈ কানাড়া ছুপাৰষ্টাৰ পুনীথ ৰাজকুমাৰ, গায়ক কে কে আৰু কমেডিয়ান ৰাজু শ্ৰীবাস্তৱ, টিভি অভিনেতা সিদ্ধান্ত সূৰ্যবংশীৰ দৰে বহু চেলিব্ৰিটিৰ হাৰ্ট এটেকত মৃত্যু হৈছে। ইয়াৰ পিছত হাৰ্ট এটেকৰ বিষয়ে বহুলভাৱে প্ৰচলিত কিছুমান ভুল ধাৰণা চৰ্চালৈ আহিছে আৰু সেইবোৰ দূৰ কৰাৰ প্ৰয়োজন আছে। ইয়াত অল ইণ্ডিয়া ইনষ্টিটিউট অৱ মেডিকেল ছায়েন্সৰ কাৰ্ডিঅ’লজি বিভাগৰ অধ্যাপক ডাঃ নীতিশ নাইকে কয় যে, “হৃদযন্ত্ৰলৈ তেজ আৰু পুষ্টি যোগান ধৰা ধমনীবোৰ হঠাতে বন্ধ হৈ যোৱাৰ ফলত হাৰ্ট এটেক হয়।
অত্যধিক ব্যায়াম কৰিলে মাৰাত্মক বুলি প্ৰমাণিত হ’ব পাৰে
নয়ডাৰ ফৰ্টিছ হাস্পতালৰ কাৰ্ডিয়াক ছায়েন্সৰ অধ্যক্ষ আৰু কাৰ্ডিয়াক চাৰ্জাৰীৰ দায়িত্বত থকা ডাঃ অজয় কৌলে বুজাইছে, "ধমনীত এটা চৰ্বিৰ স্তৰ জমা হয়। তেজৰ গোট গঠন হয়, আৰু ই ওলাই যায়।" যিসকল লোক ধূমপান কৰে, ৮-৯ ঘণ্টা বহি কাম কৰা মানুহ, মেদবহুল, ৰক্তচাপ, ডায়েবেটিছ বা উচ্চ কলেষ্টেৰল থকা লোক হাৰ্ট এটেকৰ বলি হয় বুলি নাইকে কয়। তেওঁ কয় যে এইবোৰেই একমাত্ৰ কাৰণ নহয়। জিমত অত্যধিক ব্যায়ামৰ বাবেও এনে হ’ব পাৰে।
প্ৰশিক্ষণ অবিহনে কেতিয়াও ব্যায়াম নকৰিব
পান মেক্স - কাৰ্ডিয়াক চাইন্সেছৰ প্ৰধান সঞ্চালক তথা কেথ লেবৰ মুৰব্বী ডাঃ বিবেক কুমাৰে কয় যে, "অনিয়মিত ব্যায়ামৰ ফলত হাৰ্ট এটেক হ'ব পাৰে, গতিকে প্ৰশিক্ষণ অবিহনে ব্যায়াম কৰা উচিত নহয়।" মোৰাদাবাদৰ উজালা চাইগনাছ ব্রাইটষ্টাৰ হাস্পতালৰ জ্যেষ্ঠ পৰামৰ্শদাতা তথা ‘ইণ্টাৰভেনচনেল কাৰ্ডিঅ’লজিষ্ট’ ডাঃ বিজয়া কুমাৰে কয় যে, “হয়, অত্যধিক ব্যায়ামৰ ফলত ক’ৰ’নাৰী নলীৰ প্লেক ফাটি যাব পাৰে, যাৰ ফলত হাৰ্ট এটেক হ’ব পাৰে।”
কোভিদো এটা কাৰণ
কিন্তু যুৱক-যুৱতীৰ হাৰ্ট এটেকৰ ঘটনা কেৱল অত্যধিক ব্যায়ামৰ বাবেই দেখা নাযায়। কোভিদৰ বাবে হাৰ্ট এটেকৰ ঘটনাও বৃদ্ধি পাইছে। কৌলে কয়, "এইটো সঁচা যে কোভিদে বহু সমস্যাৰ সৃষ্টি কৰিছে। কোভিদে হৃদযন্ত্ৰ আৰু হাওঁফাওঁৰ সমস্যাৰ সৃষ্টি কৰিছে।" এনে পৰিস্থিতিত প্ৰশ্ন উত্থাপন হয় যে কোভিদ বা অত্যধিক ব্যায়ামৰ কাৰণে হৃদযন্ত্ৰৰ সমস্যা হৈছে নেকি, সেই কথা কেনেকৈ গম পাব পাৰি? কৌলে কয়, ইয়াৰ বাবে ডাক্তৰৰ ওচৰলৈ যাবই লাগিব। ঘৰত বহি অৱহেলা কৰিলে নহ’ব। তেওঁ কয় যে হাৰ্ট এটেকৰ পৰা বাচিবলৈ হ’লে খোজ কঢ়া, ঘৰতে লঘূ ব্যায়াম, প্ৰাণায়াম, সুষম আহাৰ আৰু ৭-৮ ঘণ্টা টোপনি মৰাটো প্ৰয়োজনীয়।
Continue Reading
