ডিজিটেল ডেস্কঃ মধ্য প্ৰদেশত এজন ব্যক্তিয়ে মানুহক বিনামূলীয়াকৈ ৪ হাজাৰ ফুচকা খুৱাইছিল। বিনামূলীয়াকৈ ফুচকা খুওৱাৰ পোষ্টাৰ এখনো লগাই দিছিল তেওঁ। খবৰটো বিয়পি পৰাৰ লগে লগে তেওঁৰ ষ্টলত ভিৰ কৰিলেহি গ্ৰাহকে। কি ল’ৰা-ছোৱালী, কি বয়োজ্যেষ্ঠ আৰু কি ডেকা-গাভৰু, হাজাৰ মানুহ তাত গোট খালে। আপুনি নিশ্চয় ভাবিছে যে ব্যক্তিজনে মানুহক বিনামূলীয়াকৈ ফুচকা খুওৱাৰ অৰ্থ কি...
ঘটনাটো মধ্য প্ৰদেশৰ ছিণ্ডৱাৰাৰ। ইয়াত বাস কৰা সঞ্জিত চন্দ্ৰবংশীৰ ১০ বছৰৰ পাছত এটি কন্যা সন্তান জন্ম হৈছিল, এই সুখতে তেওঁ ৰাইজক ফ্ৰীতে ফুচকা খুৱাইছিল। চন্দ্ৰবংশীয়ে কয় যে তেওঁৰ তিনিজন ভাতৃ আছে আৰু যোৱা ১০ বছৰত ঘৰখনত কোনো কন্যা সন্তান জন্ম হোৱা নাই। মঙলবাৰে তেওঁৰ পত্নীয়ে এগৰাকী কন্যা সন্তানৰ জন্ম দিয়ে। সেই সুখত হিয়া উথলি উঠে সঞ্জিত চন্দ্ৰবংশীৰ।
সঞ্জিত চন্দ্ৰবংশীয়ে চিণ্ডৱাৰাৰ পোলা খেলপথাৰৰ সমীপত 'অথৰ্ব গুপচুপ এণ্ড চাট চেণ্টাৰ' নামেৰে এটা ফুচকা ষ্টল চলাই আছে। প্ৰতিদিনে তেওঁৰ প্ৰায় ২০০০ ফুচকা বিক্ৰী হয়। কন্যা সন্তান জন্ম হোৱাৰ আনন্দত তেওঁ ৪০০০ ফুচকা ৰাইজক বিনামূলীয়াকৈ খুৱাই দিলে। তেওঁ আগতেই কৈছিল যে যদি তেওঁৰ ঘৰত কন্যা সন্তান জন্ম হয় তেন্তে তেওঁ বিনামূলীয়াকৈ ফুচকা বিতৰণ কৰিব।
সঞ্জিতৰ ষ্টলত বিনামূলীয়াকৈ ফুচকা খাবলৈ অহা মানুহবোৰে যেতিয়া তাৰ আঁৰৰ কাৰণ জানিব পাৰিলে, তেতিয়া সকলোৱে সঞ্জিত চন্দ্ৰবংশীক প্ৰশংসা কৰে।
Continue Reading
