ডিজিটেল ডেস্কঃ অসমৰ এগৰাকী কণমানি ছাত্ৰীৰ নাম এইবাৰ অন্তৰ্ভুক্ত হৈছে ইণ্ডিয়া বুক অফ ৰেকৰ্ডছত৷ পুনেৰ ভাৰতী বিদ্যাপীঠ ৰবীন্দ্ৰনাথ ঠাকুৰ স্কুল অৱ এক্সেলেন্স (বিভিআৰটিএছই)ৰ পঞ্চম শ্ৰেণীৰ অক্ষিতা চাংকাকোটিয়ে ৫ মাহৰ ভিতৰত দুখন কিতাপ লিখি আটাইতকৈ কম বয়সীয়া লেখিকা হিচাবে পৰিগণিত হৈছে৷ এই কৃতিত্বৰ বাবেই অক্ষিতাৰ নাম ইণ্ডিয়া বুক অফ ৰেকৰ্ডছত অন্তৰ্ভু্ত হৈছে৷
১১ বছৰীয়া অক্ষিতাৰ পিতৃ-মাতৃ হৈছে ক্ৰমে অংশু চাংকাকতি আৰু প্ৰাৰ্থনা বৰদলৈ ৷ তেওঁলোকে বৰ্তমান কৰ্মসূত্ৰে পুনেত বাস কৰি আছে৷ অক্ষিতাৰ প্ৰথম গল্পপুথি "মিমিছ মেজিকেল এডভেঞ্চাৰছ"ৰ বৃহৎ সফলতাৰ পিছত অক্ষিতাই "দ্য আনবিটেবল ফ্ৰেইণ্ডছ – দ্য ডিফিট অফ ইভিল" নামৰ এখন কাল্পনিক কাহিনীৰ গ্ৰন্থ প্ৰকাশ কৰিছে৷ ২০২২ চনৰ জুলাইত তেওঁৰ প্ৰথম খন কিতাপ প্ৰকাশ হোৱাৰ পাঁচ মাহৰ ভিতৰত তেওঁ দ্বিতীয় খন কিতাপ সম্পূৰ্ণ কৰি প্ৰকাশ কৰিছে।
দ্বিতীয় কিতাপখন ১৯ ডিচেম্বৰ, ২০২২ তাৰিখে প্ৰকাশ পাইছিল।
নচন প্ৰেছৰ দ্বাৰা প্ৰকাশিত, "দ্য আনবিটেবল ফ্ৰেইণ্ডছ – দ্য ডিফিট অফ ইভিল" শীৰ্ষক কিতাপখনত ৩৯ টা অধ্যায় আছে আৰু "মিমিছ মেজিকেল এডভেঞ্চাৰছ" নামৰ কিতাপখন হৈছে এজনী ছোৱালীৰ কাহিনীৰ সংকলন, যিয়ে তেওঁৰ যাদুকৰী বন্ধুসকলৰ সহায়ত বিভিন্ন দেশলৈ যাদুকৰী অনুসন্ধান আৰু দুঃসাহসিক অভিযানলৈ যায়।অক্ষিতাৰ দুয়োখন কিতাপ আমাজন আৰু ফ্লিপকাৰ্টত কিণ্ডল আৰু পেপাৰবেক দুয়োটা ফৰ্মেটত উপলব্ধ হৈছে।
Continue Reading
