ডিজিটেল ডেস্কঃ যিটো সময়ত শ্বেতাংগসকলে এতিয়াও ভাৰতীয়, এছিয়ান বা কৃষ্ণাঙ্গসকলক সহজভাবে গ্ৰহণ কৰিব পৰা নাই তেনে সময়তে ভাৰতীয় বংশোদ্ভূত শিক্ষাৰ্থী অপ্সৰা আয়াৰে হাৰ্ভাৰ্ড ল ৰিভিউৰ সভাপতি নিৰ্বাচিত হৈছে। ইয়েল বিশ্ববিদ্যালয়ৰ ছাত্ৰীগৰাকীয়ে ১৩৬ বছৰ পুৰণি অভিলেখ ভংগ কৰি ইমান উচ্চ পদত অধিষ্ঠিত হোৱা প্ৰথম ভাৰতীয় মূলৰ যুৱতী হিচাবে পৰিগণিত হৈছে৷
উল্লেখ্য হাৰ্ভাৰ্ড ল ৰিভিউ হাৰ্ভাৰ্ড বিশ্ববিদ্যালয়ৰ এক আইনী প্ৰকাশন প্ৰতিষ্ঠান। ১৮৮৭ চনত প্ৰতিষ্ঠা হোৱা এই প্ৰকাশনৰ মূলতঃ শিক্ষাৰ্থীৰ প্ৰতিবেদন বা গৱেষণা প্ৰকাশ কৰে। হাৰ্ভাৰ্ড ল ৰিভিউৰ শীৰ্ষত পদত এতিয়া অধিষ্ঠিত হৈছে ভাৰতীয় বংশোদ্ভূত অপ্সৰা আয়াৰ! তেওঁ সংস্থাটোৰ ১৩৭ সংখ্যক সভাপতি হিচাবে নিৰ্বাচিত হৈছে। এই প্ৰাপ্তিত অতিকৈ আনন্দিত হৈ পৰা অপ্সৰাই কয় "মই বহু বছৰ পুৰণি প্ৰকাশনটোৰ খ্যাতি বৃদ্ধি কৰিবলৈ কাম কৰিম। "
অপ্সৰা য়েল বিশ্ববিদ্যালয়ৰ এগৰাকী ছাত্ৰী আছিল। তেওঁ ২০১৬ চনত বিশ্ববিদ্যালয় খনৰ পৰা স্নাতক ডিগ্ৰী লাভ কৰিছিল। গণিত, অৰ্থনীতি আৰু স্পেনিছ তেওঁৰ বিষয় আছিল।২০১৮ চনত তেওঁ আইনৰ শিক্ষাৰ্থী হিচাবে নামভৰ্তি কৰিছিল। তাৰ পিছতে তেওঁৰ সপোনবোৰে ঠন ধৰি উঠিছিল৷ অপ্সৰাই কামৰ পৰা ছুটি লৈ প্ৰথম বৰ্ষৰ আইনৰ অধ্যয়ন সম্পূৰ্ণ কৰিছিল। অপ্সৰাই মানৱ অধিকাৰৰ ক্ষেত্ৰতো কাম কৰিছে। এতিয়া হাৰ্ভাৰ্ড ল ৰিভিউয়ে আশা কৰিছে যে তেওঁৰ নেতৃত্বত মানৱ অধিকাৰৰ বিশয়ত বহু ভাল প্ৰতিবেদন প্ৰকাশ কৰা হ'ব।
Continue Reading
