ডিজিটেল ডেস্কঃ হৃদৰোগৰ সকলো কথা আছিল তেওঁৰ নখ দৰ্পন৷ কিদৰে হৃদযন্ত্ৰ সুস্থ কৰি ৰাখিব লাগে সেই কথাও ভালদৰেই জানিছিল তেওঁ৷ দেশৰ বিভিন্ন প্ৰান্তৰ পৰা যোৱা ১৬,০০০ ৰো অধিক হৃদৰোগীৰ অস্ত্ৰোপচাৰ সফলতাৰে সম্পন্ন কৰা গুজৰাটৰ জামনগৰৰ বিশিষ্ট হৃদৰোগ বিশেষজ্ঞ গৌৰৱ গান্ধীৰ মৃত্যু ঘটিল হৃদৰোগত আক্ৰান্ত হৈয়েই৷
শেহতীয়াকৈ পোৱা খবৰ অনুসৰি মঙলবাৰে পুৱা হৃদৰোগত আক্ৰান্ত হৈ মৃত্যু ঘটে বিশিষ্ট চিকিৎসকগৰাকীৰ৷ একাধিক সংবাদ মাধ্যমৰ প্ৰতিবেদনত প্ৰকাশ পোৱা মতে ডাঃ গান্ধীয়ে সোমবাৰে আন দিনৰ দৰে ৰোগী পৰীক্ষা কৰিছিল৷ নিশা তেওঁ জামনগৰৰ পেলেচ ৰোডত থকা তেওঁৰ ঘৰলৈ গৈছিল। তেওঁ নিশা ভোজন কৰিছিল আৰু বিচনালৈ গৈছিল।
পিছদিনা পুৱা ৬ বজাত পৰিয়ালৰ লোকসকলে তেওঁক জগাবলৈ গৈ অচেতন হৈ পৰি থকা দেখা পাইছিল৷ তেওঁক ততাতৈয়াকৈ চিকিৎসালয়লৈ লৈ যোৱা হৈছিল। কিন্তু ডাঃ গান্ধীক চিকিৎসালয়ত মৃত ঘোষণা কৰা হয় । মৃত্যুৰ সময়ত ডাঃ গান্ধীৰ বয়স আছিল ৪১ বছৰ৷ তেওঁৰ চিকিৎসাসম্পৰ্কীয় কেৰিয়াৰত ডাঃ গান্ধীয়ে ১৬,০০০ ৰো অধিক লোকৰ হৃদযন্ত্ৰৰ অস্ত্ৰোপচাৰ কৰি তেওঁলোকক সুস্থ কৰি তুলিছিল৷
ডাঃ গান্ধীয়ে জামনগৰৰ পৰা তেওঁৰ চিকিৎসা ডিগ্ৰী আৰু আহমেদাবাদৰ পৰা কাৰ্ডিঅ'লজীত বিশেষ ডিগ্ৰী লাভ কৰিছিল৷ তেওঁ 'হল্ট হাৰ্ট এটেকছ' অভিযানৰ সৈতেও জড়িত আছিল।বহু হৃদৰোগীক জীৱন দান কৰা ডাঃ গান্ধীয়ে হৃদৰোগত আক্ৰান্ত হৈয়েই মৃত্যুবৰণ কৰাৰ কথাই এতিয়া জামনগৰৰ লগতে সমগ্ৰ দেশতে শোকৰ ছাঁ পেলাইছে৷
Continue Reading
