ডিজিটেল ডেস্কঃ বিশ্বকাপ ফুটবলৰ ইংলেণ্ড-ফ্ৰান্সৰ কোৱাৰ্টাৰ ফাইনেলক লৈ যথেষ্ট উৎকণ্ঠাৰ সৃষ্টি হৈছে।লক্ষ্যণীয়ভাবে খেল খনৰ বাবে টিকটৰ চাহিদা বাঢ়িছে। দুয়োখন দেশৰ ফুটবল অনুৰাগীয়ে যিকোনো মূল্যতে খেলখনৰ টিকট সংগ্ৰহ কৰিবলৈ হেতা-ওপৰা লগাইছে। সেয়ে ক’লা বজাৰত টিকটৰ মূল্য আকাশচুম্বী হৈছে।
ইংলেণ্ড-ফ্ৰান্স বিশ্বকাপৰ খেলখনৰ বাবে টিকটৰ সংখ্যা নিৰ্ধাৰণ কৰি দিয়া হৈছিল। কিন্তু চাহিদা বাঢ়ি গৈ থকাত টিকটৰ সংখ্যা বৃদ্ধি কৰিব পাৰি নেকি সেয়াও চিন্তা কৰা হৈছে। ক'লা বজাৰত একোটা টিকটৰ মূল্য প্ৰকৃত মূল্যতকৈ ২৮ গুণ বৃদ্ধি পাইছে। ইংলেণ্ড-ফ্ৰান্সৰ কোৱাৰ্টাৰ ফাইনেল খেলৰ বাবে একোখন টিকটৰ সৰ্বনিম্ন মূল্য ১৭৫ পাউণ্ড বা ভাৰতীয় মূল্যত ১৭,৬০০টকা। সেই টিকটৰ দাম এতিয়া ৫,০০০ পাউণ্ড বা ৫ লাখ টকাতকৈ অধিক হৈছে।
ইংলেণ্ডৰ অনুৰাগীসকলৰ মাজতেই টিকটৰ চাহিদা বেছি হৈছে। হেৰী কেনক সমৰ্থন কৰিবলৈ আল বেইট ষ্টেডিয়ামত ৯,৫০০ ইংৰাজ উপস্থিত থাকিব বুলি আশা কৰা হৈছে। ইংৰাজসকলে উচ্চ মূল্যতে কোৱাৰ্টাৰ ফাইনেলৰ বাবে টিকট সংগ্ৰহ কৰি আছে।
কাটাৰৰ আইন অনুসৰি ক'লা বেহা নিষিদ্ধ।এইক্ষেত্ৰত কেৱল ফিফাৰহে বিশ্বকাপৰ টিকট বিক্ৰী কৰাৰ অধিকাৰ আছে। কাটাৰৰ আৰক্ষী, বিশ্বকাপ আয়োজক আৰু ফিফাই যুটীয়াভাৱে টিকটৰ ক'লা বেহা বন্ধ কৰিবলৈ প্ৰচাৰ চলাই আছে। কিন্তু কোনে কাৰ কথা শুনিব? কঠোৰ নিৰীক্ষণৰ মাজতে টিকটৰ অবৈধ বিক্ৰী চলিয়েই আছে।
Continue Reading
