২০২১ বৰ্ষত ১,০২০ বৰ্গ কি:মি: বনাঞ্চল হেৰুৱাইছে অসমে ইণ্ডিয়া ষ্টেট অব ফৰেষ্টছ্ ৰিপ’ৰ্টৰ ভয়ংকৰ তথ্য

জলবায়ু পৰিৱৰ্তন তথা নিৰ্বননীকৰণক লৈ বৰ্তমান সমগ্ৰ বিশ্ব উদ্বেগত ভূগি আছে৷ অথচ অধিকাংশ লোক এই ক্ষেত্ৰত সচেতন নোহোৱাৰ বাবে দিনক দিনে অৱনতি ঘটিছে আমাৰ চৌপাশৰ৷
এনে সময়তে ৰাষ্ট্ৰীয় সংবাদ মাধ্যমসমূহে ২০২২ চনৰ গ্লোবেল ফৰেষ্ট ৱাচ প্ৰতিবেদনৰ উদ্ধৃতি দি প্ৰকাশ কৰিলে এক ভয়ংকৰ তথ্য৷ এই তথ্য অনুসৰি ২০০১ চনৰ পৰা ২০২১ চনলৈ অসমে প্ৰায় ২৮৭ হাজাৰ হেক্টৰ গছৰ আৱৰণ এলেকা হেৰুৱাইছে৷

পৰিৱেশ মন্ত্ৰালয়ে প্ৰকাশ কৰা ইণ্ডিয়া ষ্টেট অৱ ফৰেষ্টছ ৰিপ'ৰ্ট মতে  উত্তৰ-পূৰ্বাঞ্চলৰ ৰাজ্যসমূহে ২০১৯-২০২১ বৰ্ষত ১,০২০ বৰ্গ কিলোমিটাৰ বনাঞ্চল হেৰুৱাইছে।  আকাৰৰ হিচাপত এইয়া প্ৰায় দিল্লীৰ সমান। 

ইণ্ডিয়ান ইনষ্টিটিউট অৱ ৰিম'ট চেঞ্চিং-ৰ দ্বাৰা কৰা শেহতীয়া অধ্যয়ন অনুসৰি, ২০২৮  চনৰ ভিতৰত, অসম আৰু অৰুণাচল প্ৰদেশৰ অঞ্চলবোৰৰ বনাঞ্চল ৯,০০৭.১৪ বৰ্গ কিমি হ্ৰাস হ'ব।

অসমৰ বনভূমিৰ তিনি লাখ হেক্টৰ (৩,৭০০ বৰ্গ কিলোমিটাৰ)তকৈও অধিক৷  কিন্তু  ৰাজ্যখনৰ মুঠ বনাঞ্চলৰ ১৩% তকৈও অধিক অংশ বেদখলকাৰীৰ  অধীনত আছে বুলি কেন্দ্ৰই এই বছৰৰ আগষ্টৰ আৰম্ভণিতে লোকসভাক জনায়।

দেখা যায় যে ,বহু  পুৰণি মূল্যৱান গছ পথ, উৰণীয়া সেঁতু, ঘাইপথ আৰু দলং নিৰ্মাণ প্ৰকল্পত হেৰুৱাইছো। লগতে সম্পূৰ্ণ হ’বলৈ বাকী থকা  আন্তঃগাঁথনিৰ ফলতো  বনাঞ্চল হ্ৰাস হ’ব৷  গতিকে অসমৰ প্ৰেক্ষাপটত  বনধ্বংস এক চিন্তাৰ বিষয়।লগতে কাঠৰ চোৰাং ব্যৱসায়েও অসমত ভয়ংকৰ পৰিস্থিতি সৃষ্টি কৰিব৷

বনাঞ্চল নৱীকৰণৰ বাবে বিভিন্ন পদক্ষেপ লোৱা হৈছে যদিও   ২০০১ চনৰ পৰা ২০২১ চনলৈ, অসমে ২৮৭ হাজাৰ হেক্টৰ গছৰ বনাঞ্চল হেৰুৱাইছে৷ লগতে  ১২৮ মেট্ৰিক টন কাৰ্বন-ড্ৰাই -অক্সাইডৰ  নিৰ্গমন হৈছে৷ অতি সোনকালে চৰকাৰ তথা নাগৰিক এই ক্ষেত্ৰত সচেতন নহ’লে এক ভয়ংকৰ ভৱিষ্যতলৈ গতি কৰিব অসমে৷