ডিজিটেল ডেস্কঃ২০২৩ চনৰ ডিচেম্বৰ মাহৰ ভিতৰত সমগ্ৰ দেশৰ গাওঁ এলেকাকে ধৰি সকলো ঠাইতে উপলব্ধ হ’ব জিঅ’ৰ ৫ জি নেটৱৰ্ক। আজি ৰিলায়েন্সৰ অধ্যক্ষ মুকেশ আম্বানীয়ে কোম্পানীৰ বাৰ্ষিক সাধাৰণ সভাত এই কথা প্ৰকাশ কৰে । তেওঁ লগতে কয় যে চলিত বৰ্ষৰ দেৱালীৰ পৰাই ভাৰতৰ বচা বচা চহৰ আৰু মহানগৰ সমূহত জিঅ’ৰ ৫ জি নেটৱৰ্ক আৰম্ভ হ’ব।
তেওঁ লগতে কয় যে প্ৰতিষ্ঠানটোৱে১,৮৮,০১২ কোটি টকা কৰ আদায় দি দেশৰ সৰ্বাধিক কৰদাতাত পৰিণত হৈছে। আম্বানীয়ে কয় যে কেৱল কৰ ৰাজহৰ জৰিয়তে ৰিলায়েন্সে ৰাষ্ট্ৰ নিৰ্মাণত অৰিহণা যোগাই থকাই নহয়, ৰিলায়েন্সে বিভিন্ন খণ্ডত ৩২০,০০০ চাকৰিৰ সৃষ্টি কৰিছে।ভাৰতৰ অন্যতম বৃহৎ নিয়োগকৰ্তা হিচাবে ৰিলায়েন্স পৰিগণিত হৈছে । ৰিলায়েন্স হৈছে ভাৰতৰ সৰ্ববৃহৎ ৰপ্তানিকৰ্তা আৰু ভাৰতৰ মুঠ সামগ্ৰী ৰপ্তানিৰ ৮ শতাংশ অকলেই ৰপ্তানি কৰি আহিছে।
এনে কাৰ্যই মূল্যৱান বৈদেশিক মুদ্ৰা উপাৰ্জন কৰাত সহায় কৰিছে বুলি আম্বানীয়ে কয়। ইয়াৰ উপৰিও ৰিলায়েন্সে বিত্তীয় বৰ্ষ ২০২২ত কৰ্পোৰেট সামাজিক দায়বদ্ধতা কাৰ্যকলাপৰ বাবে ১,১৮৫ কোটি টকা ব্যয় কৰিছে। ইয়াৰ ভিতৰত আছিল গ্ৰাম্য পৰিৱৰ্তন, স্বাস্থ্য, শিক্ষা, দুৰ্যোগ সঁহাৰিৰ লগতে উন্নয়নমূলক পদক্ষেপৰ লগতে ক্ৰীড়া ক্ষেত্ৰৰ উন্নয়ন।
ৰিলায়েন্সে ৮.৫ কোটি শ্ৰমিক আৰু সমাজৰ দুৰ্বল শ্ৰেণীৰ লোকসকলক বিনামূলীয়া আহাৰ বিতৰণ কৰিছে বুলিও আম্বানীয়ে কয়। কোম্পানীটোৱে কোভিডৰ দ্বিতীয় ঢৌৰ সময়ত প্ৰতিদিনে ১,০০০ টন অক্সিজেন উৎপাদন কৰিছিল আৰু ১ লাখৰো অধিক ৰোগীক বিনামূলীয়াকৈ অক্সিজেন প্ৰদান কৰিছিল। ইয়াৰ উপৰিও প্ৰতিষ্ঠানটোৱে কোভিডৰ সময়ত ২০০০ খনৰো অধিক বিচনাৰ চিকিৎসালয় স্থাপন কৰিছিল।
Continue Reading
