ডিজিটেল ডেস্কঃ ২০০৮ চনৰ ২৬ নৱেম্বৰত পাকিস্তানৰ সন্ত্ৰাসবাদী সংগঠন লস্কৰ-ই-তৈবা (এল ই টি)ৰ সন্ত্ৰাসবাদীয়ে মুম্বাইৰ কেইবাটাও স্থানত আক্ৰমণ সংঘটিত কৰিছিল। সন্ত্ৰাসবাদী তাহাউৰ ৰাণা ধ্বংসাত্মক ষড়যন্ত্ৰত জড়িত আছিল বুলি ইতিমধ্যে প্ৰমাণ পোৱা গৈছে। পলাতক অৱস্থাত থকা তাহাউৰ ৰাণাক শীঘ্ৰে ভাৰতলৈ আনিব পৰা যাব।
ৱাশ্বিংটনৰ এখন ফেডাৰেল আদালতে ২৬/১১ ৰ মুম্বাই আক্ৰমণৰ অন্যতম অভিযুক্ত পাকিস্তানী বংশোদ্ভুত কানাডিয়ান ব্যৱসায়ী তাহাউৰ ৰাণাক ভাৰতলৈ প্ৰত্যাৰ্পণৰ নিৰ্দেশ দিছে। দুবছৰ আগতে ভাৰতে ২০০৮ চনৰ সন্ত্ৰাসবাদী আক্ৰমণৰ অভিযুক্ত ৰাণাক ভাৰতলৈ প্ৰত্যাৰ্পণ কৰিবলৈ আবেদন কৰিছিল। আমেৰিকাৰ ৰাষ্ট্ৰপতি জো বিডেনৰ চৰকাৰেও ভাৰতৰ অনুৰোধৰ প্ৰতি সঁহাৰি জনাইছিল আৰু ৰাণাক আদালতলৈ প্ৰেৰণ কৰিছিল।নতুন দিল্লীয়ে প্ৰায় ডেৰ দশক আগতে ৱাশ্বিংটনক মুম্বাই আক্ৰমণৰ অভিযুক্ত ডেভিদ কোলমেন হেডলীৰ দীৰ্ঘদিনীয়া বন্ধু ৰাণাক ভাৰতলৈ ওভতাই আনিবলৈ আবেদন জনাইছিল।
কিন্তু ভাৰতৰ সেই আবেদন কাৰ্যকৰী নহ'ল। তাৰ পৰিৱৰ্তে তেওঁক মুকলি কৰি দিয়াহে হৈছিল। ভাৰতে অভিযোগ কৰিছিল যে ৰাণা ২০০৮ চনৰ ২৬ নৱেম্বৰত পাকিস্তানৰ পৰা অহা ১০ জন লস্কৰ-ই-তৈবা সন্ত্ৰাসবাদীয়ে সংঘটিত কৰা মুম্বাই আক্ৰমণৰ পৰিকল্পনাত পোনপটীয়াকৈ জড়িত আছিল।
১৯৯৭ চনৰ দ্বিপাক্ষিক বন্দী প্ৰত্যাৰ্পণ চুক্তিৰ অধীনত ভাৰতে পুনৰ আবেদন কৰাৰ পিছত মুম্বাইৰ সন্ত্ৰাসবাদী আক্ৰমণ সন্দৰ্ভত ২০২০ চনৰ জুন মাহত আমেৰিকা যুক্তৰাষ্ট্ৰৰ আৰক্ষীয়ে ৰাণাক পুনৰ গ্ৰেপ্তাৰ কৰিছিল। ৰাণাৰ জামিনৰ আবেদন কেলিফৰ্ণিয়াৰ আদালতত দাখিল কৰা হৈছিল, কিন্তু ডেৰ বছৰ পূৰ্বে সেয়া নাকচ কৰা হৈছিল। ফলত ৰাণাৰ প্ৰত্যাৰ্পণৰ পথ তেতিয়াই প্ৰশস্ত হৈছিল। শেহতীয়াকৈ মাৰ্কিন আদলতে দিয়া নিৰ্দেশৰ পিছত ৰাণাক হয়তো শীঘ্ৰে ভাৰতলৈ আনিব পৰা যাব।
Continue Reading
