ডিজিটেল ডেস্ক: গিনিজ বুকত অন্তৰ্ভুক্ত হ’বলৈ মানুহে কি নকৰে? এই প্ৰক্ৰিয়া অবিৰতভাৱে চলি আছে আৰু ভৱিষ্যতেও চলি থাকিব। কোনোবাই চুলি বঢ়াইছে আৰু কোনোবাই নখ বঢ়াইছে। কোনোবাই আটাইতকৈ দীঘল দাড়ি ৰাখিছে আৰু কোনোবাই আটাইতকৈ বেছি ওজন বঢ়াইছে। কিন্তু আজি যিজন ব্যক্তিৰ কাহিনী আমি আপোনালোকক ক’বলৈ ওলাইছো, তেওঁ সৰ্বাধিক সংখ্যক বিবাহ কৰাৰ অভিলেখ গঢ়ি তুলিছে। হয়! এই কথা সঁচা।
এই ব্যক্তিজনে ১০০ গৰাকীতকৈও অধিক মহিলাক নিজৰ সংগী কৰি তুলিছে। ১৯৪৯ চনৰ পৰা ১৯৮১ চনৰ ভিতৰত তেওঁ এই মহিলাসকলৰ সৈতে বিবাহপাশত আবদ্ধ হয়। আমোদজনক কথাটো হ’ল এই ব্যক্তিজনে ইমানবোৰ বিবাহ কৰাৰ পাছতো কাৰো লগত বিবাহ বিচ্ছেদ কৰা নাছিল।সৰ্বাধিক বিবাহৰ অভিলেখ তেওঁৰ হাতত আছে।
এই সন্দৰ্ভত এটা ভিডিঅ’ টুইটাৰত শ্বেয়াৰ কৰিছে গিনিজ বুক অৱ ৱৰ্ল্ড ৰেকৰ্ডে। এই ব্যক্তিজনৰ নাম জিওভানি ভিগ্লিঅ’ট’। কোৱা হয় যে এইটো তেওঁৰ প্ৰকৃত নাম নহয়। তথ্য অনুসৰি তেওঁৰ জন্ম হৈছিল ১৯২৯ চনৰ ৩ এপ্ৰিলত ইটালীৰ চিচিলিত।
১৯৪৯ চনৰ পৰা ১৯৮১ চনৰ ভিতৰত ভিগ্লিঅ’ট’ নামৰ এই ব্যক্তিজনে ১০৫-১০৫ গৰাকী মহিলাক বিয়া কৰাইছিল। আচৰিত কথাটো হ’ল এই মহিলাসকলৰ মাজত কোনো সম্পৰ্ক তথা চিনাকি নাছিল। তথ্য অনুসৰি এই ব্যক্তিজনে আমেৰিকাৰ ১৪খন দেশ আৰু ২৭খন ভিন্ন ৰাজ্যত বিবাহৰ ব্যৱস্থা কৰিছিল আৰু ভুৱা পৰিচয় দি এই মহিলাসকলক বিয়া কৰাইছিল।
প্ৰথম চিনাকিতে তেওঁ এই মহিলাসকলক বিয়াৰ প্ৰস্তাৱ দিছিল। পাছলৈ তেওঁ মহিলাসকলৰ পৰা টকা-পইচা আৰু মূল্যবান বস্তু লৈ পলাই গৈছিল। গিনিজ ৱৰ্ল্ড ৰেকৰ্ডছৰ ৱেবছাইট অনুসৰি ভিগ্লিঅ’ট’ই প্ৰায়ে মহিলাসকলক কৈছিল যে তেওঁৰ ঘৰটো বহু দূৰত, গতিকে তেওঁলোকে নিজৰ সকলো বস্তু ভিগ্লিঅ’ট’ৰ ওচৰলৈ লৈ আহিব লাগে। ইয়াৰ পাছত মহিলাসকলে প্ৰয়োজনীয় সকলো সামগ্ৰী লৈ তেওঁৰ ওচৰত উপস্থিত হৈছিল। পৰবৰ্তী সময়ত তেওঁ বজাৰত সামগ্ৰী বিক্ৰী কৰি তেওঁৰ পৰৱৰ্তী ভুক্তভোগীক বিচাৰি ওলাই গৈছিল। তেওঁৰ কেইবাবাৰো অভিযোগ আছিল যদিও তথাপিও তেওঁ পলাই গৈছিল।
তেওঁৰ শেষ ভুক্তভোগী হোৱা মহিলাগৰাকীয়ে ফ্ল’ৰিডাত তেওঁক ধৰা পেলায়। শ্বেৰন ক্লাৰ্ক নামৰ এই মহিলাগৰাকীয়ে আগতে ইণ্ডিয়ানাৰ থিভছ মাৰ্কেটত কাম কৰিছিল। ১৯৮১ চনৰ ২৮ ডিচেম্বৰত ধৰা পৰে ভিগ্লিঅ’ট’। ১৯৮৩ চনৰ জানুৱাৰী মাহৰ পৰা তেওঁৰ বিৰুদ্ধে বিচাৰ আৰম্ভ হয়, য’ত তেওঁক ৩৪ বছৰৰ কাৰাদণ্ড বিহা হয়। ইয়াৰ উপৰিও ৩ লাখ ৩৬ হাজাৰ ডলাৰ জৰিমনাও আৰোপ কৰা হৈছিল। জীৱনৰ শেষৰ ৮ বছৰ এৰিজোনাৰ কাৰাগাৰত কটায়। ১৯৯১ চনত ৬১ বছৰ বয়সত তেওঁৰ মৃত্যু হয়।
Continue Reading
