ডিজিটেল ডেস্কঃ বলীউডৰ ৰাষ্ট্ৰীয় বঁটা বিজয়ী কলা পৰিচালক নীতিন চন্দ্ৰকান্ত দেশাইৰ আত্মহত্যা। বুধবাৰে পুৱা মহাৰাষ্ট্ৰৰ কাৰ্জাতস্থিত তেওঁৰ ষ্টুডিঅ’ত আৰক্ষীয়ে চিপ লৈ থকা অৱস্থাত উদ্ধাৰ কৰে চন্দ্ৰকান্ত দেশাইৰ মৃতদেহ। ৰায়গড়ৰ আৰক্ষী অধীক্ষক পি সোমনাথ ঘৰে কয় যে আৰক্ষীয়ে বিষয়টো সকলো দিশৰ পৰা তদন্ত কৰি আছে। মৃত্যুৰ সময়ত তেওঁৰ বয়স আছিল ৫৭ বছৰ।
মহাৰাষ্ট্ৰৰ ডাপোলি চহৰৰ পৰা অহা নীতিন দেশাইয়ে কেইবাখনো মাৰাঠী আৰু হিন্দী ছবিৰ আৰ্ট ডাইৰেক্টৰ আৰু প্ৰডাকচন ডিজাইনাৰ হিচাপে কাম কৰিছিল। হম দিল দে চুকে ছানম (১৯৯৯), লগান (২০০১), দেৱদাস (২০০২), জোধা আকবৰ (২০০৮) আৰু প্ৰেম ৰতন ধন পায়ো (২০১৫) আদি ছবিত নীতিন দেশাইয়ে ছেট ডিজাইন কৰিছিল। ২০১৬ চনত দিল্লীত অনুষ্ঠিত হোৱা বিশ্ব সাংস্কৃতিক মহোৎসৱৰ সৈতেও তেওঁ জড়িত আছিল।
কলা পৰিচালনাৰ বাবে দেশাইয়ে চাৰিবাৰ ৰাষ্ট্ৰীয় চলচ্চিত্ৰ বঁটা আৰু ৯ বাৰকৈ ফিল্মফেয়াৰ বঁটা লাভ কৰে। ২০০৫ চনত তেওঁ নৱী মুম্বাইৰ কাৰ্জাটত ৫২ একৰ মাটিত বিস্তৃত এন ডি ষ্টুডিঅ’ মুকলি কৰে, য’ত তাৰ পিছৰ পৰা জোধা আকবৰ (২০০৮), ট্ৰেফিক চিগনেল (২০০৭) আৰু কালাৰ্ছ টিভিৰ ৰিয়েলিটি শ্ব’ ‘বিগ বছ’ৰ দৰে শ্ব’ৰ আয়োজন কৰা হয়।
আৰ্থিক সমস্যাৰ বাবেই নীতিন চন্দ্ৰকান্ত দেশাইয়ে আত্মহত্যা কৰাৰ সন্দেহ প্ৰকাশ পাইছে।
নীতিন দেশাইয়ে হঠাতে এই পৃথিৱীৰ পৰা বিদায় লোৱাৰ পাছতে বহু চলচ্চিত্ৰ তাৰকাৰ মাজত শোকৰ ঢৌ উঠিছে। ২০ বছৰীয়া কেৰিয়াৰত দেশাইয়ে আশুতোষ গোৱাৰিকাৰ, বিধু বিনোদ চোপ্ৰা, ৰাজকুমাৰ হিৰানী, সঞ্জয় লীলা ভাঞ্চালীৰ দৰে প্ৰখ্যাত ছবি পৰিচালকৰ সৈতে কাম কৰিছে।
Continue Reading
