৪২ ঠাইত তালাচী, বৃহৎ পৰিমাণৰ নগদ ধন-গহনা জব্দ

ডিজিটেল ডেস্ক : ঝাৰখণ্ড আৰু পশ্চিম বংগত কয়লা মাফিয়াৰ বিৰুদ্ধে শুকুৰবাৰে ব্যাপক অভিযান চলায় আইন বলবৎকাৰী সঞ্চালকালয়ে (ইডি)। ধনৰ অবৈধ সৰবৰাহৰ গোচৰৰ সংক্ৰান্তত ই ডিয়ে দুয়োখন ৰাজ্যৰ ৪২ ঠাইত তালাচী চলায়।

পুৱা ৬ বজাৰ পৰা ই ডিৰ শতাধিক বিষয়াই এই তালাচী চলায়। তালাচীৰ সময়ত ই ডিৰ বিষয়াসকলে টোল কালেকশ্যন বুথ আৰু নিৰীক্ষণ চকীসমূহৰো সন্ধান কৰে। তালাচীত ই ডিৰ বিষয়াই বৃহৎ পৰিণাণৰ নগদ ধন, গহনাসহ বহুতো সম্পত্তি জব্দ কৰে। 

সূত্ৰসমূহে প্রকাশ কৰা মতে, ই ডিৰ ৰাঁচী শাখাৰ এটা দলে কয়লা চুৰি আৰু চোৰাং ব্যৱসায়ৰ সৈতে জড়িত অনুসন্ধানৰ বাবে ঝাৰখণ্ডৰ ১৮ ঠাইত তালাচী চলায়। এই সংক্রান্তত কয়লা মাফিয়া অনিল গোবেল, সঞ্জয় উধ্যোগ, লালু বাবু সিং আৰু অমৰ মণ্ডলৰ বিভিন্ন চৌহদত তালাচী চলায়। দেবপ্রভা কোম্পানীৰ সঞ্চালক লাল বাবু সিং আৰু তেওঁৰ ভাতৃ কৃপানাথ সিঙৰ ধানবাদ আৰু ঝৰিয়াত থকা চৌহদসমূহত তালাচী চলায়। 

এই অভিযানৰ সময়ত কয়লা মাফিয়া কেইজনৰ পৰা নগদ ধনসহ বহুতো সম্পত্তি জব্দ কৰা হয়। আনহাতে, পশ্চিম বংগৰ প্ৰায় ২৪ ঠাইত ই ডিয়ে ব্যাপক তালাচী চলায়। এই তালাচী কয়লাৰ অবৈধ খনন আৰু মজুতৰ বিৰুদ্ধে চলোৱা হৈছিল। পশ্চিম বংগত নৰেন্দ্ৰ খৰকা, যুধিষ্ঠিৰ ঘোষ, কৃষ্ণ মুৰাৰী কায়ল, চিন্ময় মণ্ডলসহ কেইবাজনো কয়লা ব্যৱসায়ীৰ চৌহদত ই ডিয়ে তালাচী চলায়।

উৎসঃ দৈনিক জনমভূমি