ডিজিটেল ডেস্কঃ দেশৰ ৰাজধানী এতিয়া পানীৰ তলত! দিল্লীৰ প্ৰায় ৯৫ শতাংশ এলেকা এতিয়া বানত ডুব গৈছে। যোৱা কেইদিন ধৰি হোৱা নেৰানেপেৰা বৰষুণে দিল্লীত ভয়ংকৰ বানৰ সৃষ্টি কৰিছে। যমুনা নদী বিপদসীমাৰ ওপৰেৰে বৈ আছে। দিল্লীত উচ্চ সতৰ্কতা অৱলম্বন কৰা হৈছে। ছ'চিয়েল মিডিয়াত ভাইৰেল হোৱা দিল্লীৰ বানৰ ছবি আৰু ভিডিঅ'বোৰে মানুহক এতিয়া আতংকিত কৰি তুলিছে।
দিল্লীত এইবাৰ বানৰ ৪৫ বছৰ পুৰণি অভিলেখ ভংগ হৈছে। ১৯৭৮ চনত যমুনাৰ পানীৰ স্তৰ ২০৪.৭৯ মিটাৰ হৈছিল। এইবাৰ পানীৰ স্তৰ ২০৮.৪৮ মিটাৰ হৈছে। যমুনাৰ পানীয়ে বহু এলেকা বুৰাই পেলাইছে। কাশ্মীৰে গেট, মজনু কি তিলা, আইটিঅ', লালকিল্লা আৰু দিল্লী সচিবালয় প্লাবিত হৈছে।
দিল্লীৰ ৰাষ্ট্ৰীয় স্মাৰক ইণ্ডিয়া গেটো জলমগ্ন হোৱাৰ সম্ভাৱনা আছে। ডুব গৈছে ৰিং ৰোড আৰু আইপি ফ্লাইঅভাৰৰ ওচৰৰ এলেকাও। ফলত যান-বাহনৰ চলাচল ব্যাহত হৈ পৰিছে।দিল্লীৰ চৰকাৰে বানৰ বাবেই লালকিল্লা দৰ্শনাৰ্থীৰ বাবে বন্ধ ঘোষণা কৰিছে, লগতে দেওবাৰলৈ দিল্লীৰ সকলো বিদ্যালয় বন্ধ ঘোষণা কৰা হৈছে।
আনকি দিল্লীৰ মুখ্যমন্ত্ৰী অৰবিন্দ কেজৰিৱালৰ ঘৰৰ সন্মুখতো বানৰ তাণ্ডৱ চলিছে। উল্লেখ্য সমগ্ৰ উত্তৰ ভাৰতে যোৱা কেইদিনমানধৰি ধাৰাসাৰ বৰষুণৰ সন্মুখীন হৈ আছে। দিল্লী, পঞ্জাৱ, হিমাচল প্ৰদেশ বৰষুণ আৰু ভূমিস্খলন সম্পূৰ্ণৰূপে বিধ্বস্ত হৈ পৰিছে। বহু ঠাইত বাট-পথৰ চিন-মোকাম নোহোৱা হৈ পৰিছে। ইয়াৰ মাজতে হাৰিয়ানাৰ হাতনিকুণ্ড বান্ধৰ পৰা পানী এৰি দিয়া হৈছে। ফলত, যমুনাৰ পানীৰ স্তৰ বিপদসীমাত কৈ তিনি মিটাৰ বৃদ্ধি পাইছে।
