৪৫ দিন কেতিয়াবাই উকলিল: আজিও দাখিল নহ’ল প্ৰতিবেদন, নগালেণ্ডৰ পৰা ‘আফস্পা’ প্ৰত্যাহাৰ কেতিয়া?

ডিজিটেল ডেস্ক: নগালেণ্ডৰ পৰা সশস্ত্ৰ বাহিনী বিশেষ ক্ষমতা আইন, চমুকৈ ‘আফস্পা’ প্ৰত্যাহাৰৰ পৰামৰ্শ দিবলৈ কেন্দ্ৰীয় চৰকাৰৰ গৃহ-মন্ত্ৰণালয়ে গঠন কৰা সমিতিৰ প্ৰতিবেদন দাখিলৰ সময়সীমা উকলিছে৷ বিগত বৰ্ষৰ ৪ ডিচেম্বৰত নগালেণ্ডৰ মন জিলাত সংঘটিত গণহত্যাৰ দেশজোৰা প্ৰতিক্ৰিয়াস্বৰূপে আৰু ৰাজ্যখনৰ মুখ্যমন্ত্ৰী নেফিঅ’ ৰিঅ’ৰ প্ৰচেষ্টাত সেই বছৰৰে ২৩ ডিচেম্বৰত নতুন দিল্লীত অনুষ্ঠিত হৈছিল বৈঠক৷ গৃহমন্ত্ৰী অমিত শ্বাহৰ সভাপতিত্বত অনুষ্ঠিত বৈঠকত নগালেণ্ডৰ মুখ্যমন্ত্ৰী নেফিঅ’ ৰিঅ’, অসমৰ মুখ্যমন্ত্ৰী হিমন্ত বিশ্ব শৰ্মা, নগালেণ্ডৰ উপ-মুখ্যমন্ত্ৰীসহিতে কেইবাগৰাকীও উচ্চপদস্থ বিষয়া উপস্থিত আছিল৷ ভাৰতৰ ৰেজিষ্ট্ৰাৰ জেনেৰেল বিবেক যোশীৰ অধ্যক্ষতাত কেন্দ্ৰীয় চৰকাৰে গঠন কৰি দিছিল সমিতি৷ যিখন সমিতিৰ সদস্য আছিল পীযূষ গোৱেলো৷ সেই সমিতিক নগালেণ্ডৰ পৰা আফস্পা প্ৰত্যাহাৰ সন্দৰ্ভত প্ৰতিবেদন আৰু পৰামৰ্শ প্ৰদান কৰিবলৈ ৪৫দিনৰ সময়সীমা দিয়া হৈছিল৷ নগালেণ্ডৰ মুখ্যমন্ত্ৰী নেইফিউ ৰিঅ’ই আগতে কৈছিল যে সমিতিখনে ইয়াৰ পৰামৰ্শ প্ৰতিবেদন উপস্থাপন কৰিবলৈ ৪৫দিন সময় পাইছিল (৯ ফেব্ৰুৱাৰীৰ ভিতৰত)। গৃহ-মন্ত্ৰণালয়ৰ নিৰ্দেশনাত কোৱা হৈছিল যে, সমিতিখনে পৰৱৰ্তী তিনিমাহৰ ভিতৰত (২৬ মাৰ্চ, ২০২২) উপযুক্ত পৰামৰ্শ আগবঢ়াব লাগিব। ২০২১ৰ ৪ ডিচেম্বৰত ভাৰতীয় সেনাৰ ২১টা পেৰা বিশেষ বাহিনীৰ কমাণ্ডোসকলে বিদ্ৰোহীবিৰোধী অভিযানত ১৩জনকৈ নাগৰিকক গুলীয়াই হত্যা কৰে। সেনা গোটৰ দ্বাৰা ৪ ডিচেম্বৰৰ আক্ৰমণৰ বিৰুদ্ধে বৰ্ধিত অসামৰিক ক্ষোভৰ পৰিপ্ৰেক্ষিতত গঠন কৰা হৈছিল সমিতি৷ মুখ্যমন্ত্ৰী নেফিঅ’ ৰিঅ’ৰ দাবী অনুসৰি ৪৫ দিনৰ ভিতৰত প্ৰতিবেদন দাখিল কৰিব বিচৰা নগালেণ্ডৰ পৰা সশস্ত্ৰ বাহিনী(বিশেষ ক্ষমতা) আইন বা প্ৰত্যাহাৰৰ অধ্যয়নৰ বাবে ডিচেম্বৰত কেন্দ্ৰীয় গৃহ-মন্ত্ৰণালয়ে গঠন কৰা সমিতিয়ে এতিয়াও প্ৰতিবেদন দাখিল কৰিব পৰা নাই৷ স্বাভিমানী নগালেণ্ডবাসীয়ে ভাৰতীয় সেনাৰ সেই গণহত্যাৰ বিৰুদ্ধে দল-মত নিৰ্বিশেষে একত্ৰিত হৈ ‘আফস্পা’ প্ৰত্যাহাৰৰ দাবী জোৰদাৰ কৰি তুলিছিল৷ আনকি, ৰাজ্যখনৰ বিজেপি নেতা সোচ্চাৰ হৈ পৰিছিল গৃহমন্ত্ৰী শ্বাহৰ বিৰুদ্ধে৷ কেন্দ্ৰীয় চৰকাৰে ‘আফস্পা’ প্ৰত্যাহাৰৰ বাবে সমিতি গঠন কৰি দিয়াৰ পাছত নগালেণ্ডবাসী আশ্বস্ত হৈছিল৷ কিন্তু, ৪৫দিন উকলি যোৱাৰ পাছতো প্ৰতিবেদন দাখিল নকৰি নগালেণ্ডবাসীক প্ৰতাৰণা কৰিলে নেকি কেন্দ্ৰীয় চৰকাৰে, এই প্ৰশ্ন এতিয়া সৰ্বত্ৰ উচ্চাৰিত হৈছে৷