ৰাছিয়াত বিমান দুর্ঘটনাত ৪৮জনৰ মৃত্যু

ডিজিটেল ডেস্ক : ৰাছিয়াৰ একেবাৰে পূব প্ৰান্তৰ আমুৰ অঞ্চলত বৃহস্পতিবাৰে এখন এণ্টন'ভ এ এন-২৪ বিমান দুর্ঘটনাত পতিত হয়।

পাছত আমুৰ অঞ্চলৰ মুৰব্বীজনে জনায় যে কৰ্মচাৰী আৰু যাত্রীকে ধৰি উক্ত বিমানত থকা ৪৮জন লোকৰেই মৃত্যু ঘটিছে।

উক্ত বিমানখনৰ যাত্ৰাৰ লক্ষ্য আছিল ৰাছিয়াৰ ৰাজধানী মস্কোৰ পৰা ৭,০০০ কিল'মিটাৰ নিলগৰ টিণ্ডা নগৰ। বিমানখন দুৰ্ঘটনাত পতিত হোৱাৰ পাছত ৰাছিয়াৰ জৰুৰী পৰিস্থিতি মন্ত্ৰ্যালয়ে জনাইছিল যে টিণ্ডাৰ দক্ষিণৰ এক পাহাৰীয়া অঞ্চলত বিমানখনৰ জ্বলি থকা ফিউজলাজ (দেহাংশ) পোৱা গৈছে। ছাইবেৰিয়াৰ আংগাৰা এয়াৰলাইনছ পৰিচালিত বিমানখন প্ৰথমতে খাবাৰ'ভস্কৰ পৰা ব্লাগ'ভেছচেনস্কলৈ আৰু তাৰ পাছত ৰাছিয়া-চীন সীমান্তৰ টিণ্ডা নগৰলৈ ৰাওনা হৈছিল।

উক্ত বিমানখন দুর্ঘটনাত পতিত হোৱাৰ কাৰণ তাৎক্ষণিকভাৱে জানিব পৰা হোৱা নাই। ৰাছিয়াৰ ইণ্টাৰফেক্স নিউজ এজেন্সিৰ মতে দুৰ্ঘটনাৰ সময়ত উক্ত অঞ্চলত বতৰ প্ৰতিকূল আছিল।

উৎসঃ দৈনিক জনমভূমি