ডিজিটেল ডেস্কঃ বৰ্তমান মানুহৰ জীৱনত ছেলফীৰ গুৰুত্ব অপৰিসীম। কিছুমান মানুহৰ ছেলফী তোলাৰ নিচা থাকে কিন্তু এই নিচাৰ বাবেই কেতিয়াবা বহু মানুহ বিপদত পৰা দেখা যায়। শেহতীয়াকৈ ছেলফীৰ বাবে বিপদত পৰিল এগৰাকী আৰক্ষী বিষয়া। উত্তৰ প্ৰদেশ আৰক্ষীৰ উপ-পৰিদৰ্শক ৰমেশ সাহানীৰ পত্নী আৰু পুত্ৰ-কন্যাই এখন চেলফি তুলিছিল। আৰু সেই চেলফিৰ বাবেই এতিয়া ডাঙৰ বিপদত পৰিছে ৰমেশ সাহানী।
এই উপ-পৰিদৰ্শকজন উন্নাও জিলাৰ বেটা মুজাৱাৰ অঞ্চলত নিযুক্ত হৈ আছিল। বৃহস্পতিবাৰে (২৯ জুন) তেওঁৰ পত্নী আৰু সন্তানৰ চেলফি ইণ্টাৰনেটত ভাইৰেল হৈ পৰে। ছবিখনত দেখা গৈছে বিচনাত ৫০০ টকীয়া নোটৰ বাণ্ডিল সজাই থোৱা আছে। য’ত তেওঁলোকে ৫০০ টকীয়া নোটৰ বাণ্ডিল লৈ পোজ দিয়া দেখা গৈছে। নোটৰ বাণ্ডিলৰ সৈতে এই ছবি ভাইৰেল হোৱাৰ পিছতে উপ-পৰিদৰ্শক ৰমেশ সাহানীক বদলি কৰা হয়।
নগদ ধনৰ বাণ্ডিলসহ আৰক্ষীগৰাকীৰ পৰিয়ালে তোলা এই ছেলফীৰ বাবে আৰক্ষী বিষয়া ৰমেশ সাহানীক তৎক্ষণাত বদলি কৰা হয়। পত্নী আৰু সন্তানে তোলা ছেলফী ছ’চিয়েল মিডিয়াত ভাইৰেল হোৱাৰ পাছতে পুলিচজনৰ বিৰুদ্ধে তদন্ত আৰম্ভ হয়।
বৰ্তমান ছ’চিয়েল মিডিয়াত ভাইৰেল হৈ থকা ফটোখনত আৰক্ষী বিষয়াগৰাকীৰ পত্নী আৰু দুই সন্তানে ১৪ লাখ টকাৰ প্ৰকাণ্ড নগদ ধনৰ বাণ্ডিল লৈ বিচনাত বহি থকা দেখা গৈছে।
নোটৰ বাণ্ডিলৰ ফটো ভাইৰেল হোৱাৰ লগে লগে আৰক্ষীৰ এজন জ্যেষ্ঠ বিষয়াই বিষয়টোৰ তদন্তৰ নিৰ্দেশ দিয়ে।
অৱশ্যে ৰমেশ চন্দ্ৰ সাহানীয়ে নিজৰ পক্ষ ৰক্ষা কৰি কয় যে এই ফটোখন ২০২১ চনৰ ১৪ নৱেম্বৰত লোৱা হৈছিল, যেতিয়া তেওঁ এটা পৰিয়ালৰ সম্পত্তি বিক্ৰী কৰিছিল। ফটোখনত দেখুওৱা নগদ ধনখিনি হৈছে সেই সম্পত্তিৰ বিক্ৰীৰ পৰা পোৱা ধন।
আৰক্ষী অধীক্ষক সিদ্ধাৰ্থ শংকৰ মীনাই এই বিষয়ত উদ্বেগ প্ৰকাশ কৰি ঘটনাৰ পুংখানুপুংখ তদন্ত আৰম্ভ কৰিছে।
Continue Reading
