৬ছেণ্টিমিটাৰ নেজৰ সৈতে ভূমিস্থ হৈছিল এটি শিশু, পৰৱৰ্তী সময়ত বৃদ্ধি পাইছিল নেজৰ দৈঘ্যতা

এক প্ৰতিবেদন অনুসৰি চিজাৰিয়ান প্ৰসৱ অৰ্থাৎ অপাৰেচনৰ জৰিয়তে চিকিৎসালয়ত কন্যা সন্তান জন্ম দিয়ে মহিলাগৰাকীয়ে। মাতৃ সম্পূৰ্ণ শাৰীৰিকভাৱে সুস্থ আছিল যদিও জন্মতে কন্যা সন্তানটিৰ আছিল নেজ । উল্লেখযোগ্য যে সন্তানটিৰ নেজদালত উপযুক্ত পেশী আৰু স্নায়ু আছিল। এই সমগ্ৰ গোচৰৰ তথ্য জাৰ্নেল অৱ পেডিয়াট্ৰিক চাৰ্জাৰীত প্ৰকাশ পাইছে। শিশুটিৰ নেজৰ দৈৰ্ঘ্য ৫.৭ চে.মি. আৰু ব্যাস ৩.৫ মি.মি. চুলি আৰু ছালৰে আবৃত নেজদালত স্নায়ু আছিল আৰু বেজীৰে বিন্ধি  দিলে সন্তানটিয়ে  কান্দিছিল।

এক্সৰে ৰিপৰ্ট অহাৰ পাছতে চিকিৎসকৰ পৰীক্ষা নিশ্চিত হয়। য’ত দেখা গ’ল যে নেজদালত হাড় বা অন্যান্য জটিলতা নাই। অৰ্থাৎ ই শৰীৰৰ এক অসাৰ অংগ। যদিও চিকিৎসকে কোনো ধৰণৰ ৰিস্ক লোৱা নাছিল আৰু লগতে নৱজাতকৰ মগজু আৰু মেৰুদণ্ডকে ধৰি আন বহু অংগও পৰীক্ষা কৰিছিল। চিকিৎসকে একেৰাহে দুমাহ ধৰি ছোৱালীজনীৰ ওপৰত চকু ৰাখিছিল। তেওঁৰ নেজদালৰ পুনৰ পৰীক্ষা কৰোতে দেখা গ’ল যে ইয়াৰ দৈৰ্ঘ্য দিনে দিনে বাঢ়ি গৈছিল। ইয়াৰ পাছত চিকিৎসকে নেজদাল আঁতৰাই প্লাষ্টিক চাৰ্জাৰী কৰাৰ সিদ্ধান্ত লয়। সৰু অস্ত্ৰোপচাৰৰ পাছত নেজদাল আঁতৰাই দিয়া হ’ল আৰু এতিয়া সেই মৰমলগা ছোৱালীজনী সম্পূৰ্ণ ভাল। আলোচনীখনত প্ৰকাশিত প্ৰতিবেদন অনুসৰি এই বিৰল ক্ষেত্ৰত শিশুটিৰ স্নায়ুতন্ত্ৰৰ লগত নেজদাল সংযুক্ত হোৱা নাছিল, সেয়েহে সাধাৰণ অস্ত্ৰোপচাৰেৰে আঁতৰাই পেলোৱা হৈছিল।

এই গোচৰৰ ছবি ছ’চিয়েল মিডিয়াত ভাইৰেল হৈ পৰিছে। যাৰ ওপৰত মানুহৰ বিভিন্ন প্ৰতিক্ৰিয়া আহি আছে। কোনো কোনোৱে এইটো এটা অলৌকিক বুলি কৈছে, আন কোনোৱে ইয়াক সাধাৰণ বুলি উল্লেখ কৰিছে । অৱশ্যে এই বিষয়টো যদি ভাৰতৰ যিকোনো গাঁৱত চৰ্চালৈ আহিলহেঁতেন তেন্তে নিশ্চয় এই ছোৱালীজনীক চাবলৈ মানুহৰ ভিৰ হ’লহেঁতেন।