৮০০ কোটি হ’ল বিশ্বৰ জনসংখ্যা! জনসংখ্যা বৃদ্ধিত সৰ্বাধিক অৱদান আগবঢ়াইছে ভাৰতে

ডিজিটেল ডেস্কঃ মংগলবাৰে ৮০০ কোটি হ’ল বিশ্বৰ জনসংখ্যা। এই বিৰল কৃতিত্ব অৰ্জনত সৰ্বাধিক অৱদান ভাৰতে আগবঢ়াইছে।

যি হাৰত ভাৰতত জনসংখ্যা বৃদ্ধি হৈছে, তালৈ লক্ষ্য কৰিলে ক’ব পাৰি যে এক বছৰৰ ভিতৰতে ই চীনকো অতিক্ৰম কৰিব। এই মত প্ৰকাশ কৰিছে ৰাষ্ট্ৰসংঘই।

ৰাষ্ট্ৰসংঘৰ জনসংখ্যা বিষয়ক দপ্তৰ ইউএনএফপিএৰ তৰফৰ পৰা জনোৱা হৈছে যে ২০৩৭ চনৰ ভিতৰত বিশ্বৰ জনসংখ্যা আৰু ১০০ কোটি বাঢ়ি যাব। তাত সৰ্বাধিক অৱদান থাকিব এছিয়া আৰু আফ্ৰিকাৰ।

আনহাতে, চীন আৰু ইউৰোপত জনসংখ্যা খুব কম গতিৰে বাঢ়িব বুলি ৰাষ্ট্ৰসংঘই জনাইছে।

ৰাষ্ট্ৰসংঘই জনোৱামতে, বিশ্বৰ জনসংখ্যা ৭০০ কোটিৰ পৰা ৮০০ কোটি হওঁতে ১২ বছৰৰ প্ৰয়োজন হৈছে। কিন্তু ৮০০ৰ পৰা ৯০০ কোটি পাওঁতে সময় লাগিব ১৪ বছৰৰ। ইয়াৰ কাৰণ হৈছে, সমগ্ৰ বিশ্বজুৰি জন্মহাৰ কমিছে।

জুলাই মাহত প্ৰকাশিত ‘দ্যা ৱৰ্লড পপুলেচন প্ৰস্পেক্টছ ২০২২’ অনুযায়ী, ২০২২ চনত ভাৰত জনংখ্যা ১৪১.২ কোটি হোৱাৰ বিপৰীতে চীনৰ জনসংখ্যা ১৪২.৬ কোটি।