জম্মু-কাশ্মীৰত প্ৰবল তুষাৰপাত, ২৬ জানুৱাৰীলৈকে অপৰিৱৰ্তিত থাকিব বতৰ

ডিজিটেল ডেস্ক : সমগ্ৰ উত্তৰ ভাৰতত বতৰৰ অৱস্থাৰ দ্রুত পৰিৱৰ্তন ঘটিছে শুকুৰবাৰে। বিজুলী-ঢেৰেকনিৰে দিল্লীত বৰষুণ হৈছে। আনহাতে, জম্মু-কাশ্মীৰ, হিমাচল প্রদেশ আৰু উত্তৰাখণ্ডৰ বিভিন্ন অংশত প্রবল তুষাৰপাত হৈছে। প্রবল তুষাৰপাতৰ বাবে ৰাজ্যকেইখনত বিমান আৰু পথ যাতায়াত ব্যৱস্থা ব্যাহত হৈছে। ভাৰতীয় বতৰ বিজ্ঞান বিভাগে (আই এম ডি) প্রকাশ কৰা মতে, দিল্লীত শুকুৰবাৰৰ গোটেই দিনটো আকাশ ডাৱৰীয়া হৈ থাকিব। 

ইফালে, জম্মু-কাশ্মীৰত নতুনকৈ প্রবল তুষাৰপাত হৈছে। জনপ্রিয় 'স্কি' পর্যটনস্থলী গুলমার্গতো বৰফৰ শুকুলা আচ্ছাদনে দৃষ্টিনন্দন পৰিৱেশৰ সৃষ্টি কৰিছে। যদিও পূৰ্বতে এই পৰিৱেশে পৰ্যটক আৰু স্থানীয় লোকসকলক আনন্দ দিছিল, কিন্তু এইবাৰ এখন বিপৰীত ছবিহে দেখা গ'ল। অত্যধিক বৰফ জমা হোৱাৰ বাবে কাশ্মীৰ উপত্যকাত ব্যক্তিগত বাহন আৰু ৰাজহুৱা পৰিবহণ ব্যৱস্থাও ব্যাহত হৈছে। অত্যাৱশ্যকীয় সামগ্ৰীৰ ক্ষেত্ৰতো অসুবিধাৰ সৃষ্টি হৈছে। 

প্রবল তুষাৰপাতৰ বাবে শ্রীনগৰ বিমান বন্দৰত সকলো বিমানৰ উৰণ বাতিল কৰা হয়। কাশ্মীৰৰ পৰা অহা-যোৱা সকলো বিমানৰ চলাচল বাতিল কৰিব লগা হয়। আই এম ডিৰ মতে 'ৱেষ্টার্ন ডিষ্টাৰবেন্স'ৰ বাবে উত্তৰ পশ্চিম ভাৰতত ২৬ জানুৱাৰীলৈকে বতৰৰ অৱস্থা অপৰিৱৰ্তিত থাকিব। আনহাতে, জম্মু-কাশ্মীৰৰ উধমপুৰত প্ৰবল তুষাৰপাতত আবদ্ধ হৈ পৰা ১২জন পর্যটকক ৩ ঘণ্টীয়া প্ৰচেষ্টাৰ অন্তত উদ্ধাৰ কৰিব পৰা গ'ল।

উৎসঃ দৈনিক জনমভূমি