দুর্ভিক্ষৰ কৰাল গ্রাসত নাইজেৰিয়া, সাম্প্রদায়িক সংঘৰ্ষত জৰ্জৰ পশ্চিম আফ্ৰিকাৰ দেশখনত বন্ধ হৈছে বিদেশী সাহায্য

ডিজিটেল ডেস্ক: পশ্চিম আফ্ৰিকাৰ দেশ নাইজেৰিয়া চলিত বৰ্ষত ভয়াৱহ দুর্ভিক্ষৰ কবলত পৰাৰ সম্ভাৱনা প্রকট হৈ পৰিছে। দেশখনৰ ৩.৫ কোটি লোকে বছৰটোত দুর্ভিক্ষৰ সন্মুখীন হোৱাটো প্রায় নিশ্চিত হৈ পৰিছে। তদুপৰি, সংঘর্ষ বিধ্বস্ত দেশখনৰ ৩০ লাখ শিশুরে পুষ্টিহীনতাত ভুগিব লগা হৈছে। দেশখনলৈ বিশ্বজনীন সাহায্য বন্ধ হৈ পৰাৰ পাছতে বৃহস্পতিবাৰে ৰাষ্ট্ৰসংঘই প্ৰকাশ কৰা প্ৰতিবেদনত এই চিন্তা উদ্রেককাৰী তথ্য প্রকাশ পাইছে। 

নাইজেৰিয়াৰ ৰাজধানী আবুজাত চলিত বৰ্ষৰ মানৱীয় সাহায্য শিবিৰ মুকলি কৰি ৰাষ্ট্ৰসংঘৰ সমন্বয়ক মহম্মদ মালিক ফলে কয় যে দেশখনলৈ বিদেশী সাহায্য বন্ধ হৈ পৰিছে যাৰ ফলত জনতাৰ প্রয়োজনীয়তা পূৰণ কৰাটো কঠিন হৈ পৰিছে। উল্লেখযোগ্য যে দেশখনৰ বোৰনো, আডামাৱা, য়াবে আদি অঞ্চলত সাম্প্রদায়িক সংঘর্ষ বৃদ্ধি পোৱাত আকালে দেখা দিছে। 

এই অঞ্চলকেইটাত ২০২৫ চনত প্রথম ৮টা মাহতে আত্মঘাতী বোমা আক্রমণ আৰু অন্যান্য আক্রমণত চাৰি হাজাৰ লোকৰ মৃত্যু হৈছিল। দেশখনৰ দুর্ভিক্ষ নিবাৰণৰ বাবে ৰাষ্ট্ৰসংঘই কিছু পৰিমাণে ব্যৱস্থা গ্রহণ কৰিছে। চলিত বৰ্ষত দেশখনৰ ২৫ লাখ লোকে জীৱনদায়িনী সামগ্রী লাভ কৰিব পৰাকৈ ৰাষ্ট্ৰসংঘই ৫১৬ নিযুত মার্কিন ডলাৰৰ সাহায্য আগবঢ়াইছে। যিটো ২০২৫ চনতকৈ যথেষ্ট কম। 

উল্লেখযোগ্য যে ২০২৫ চনৰ মাজভাগৰ পৰাই নাইজেৰিয়াত কম-বেছি পৰিমাণে দুর্ভিক্ষই দেখা দি আহিছে। যোৱা বৰ্ষৰ এপ্ৰিলৰ পৰা অক্টোবৰলৈ দেশখনত কেইবাবাৰো হোৱা বানত প্রায় ৩.৫০ লাখ লোক ক্ষতিগ্রস্ত হোৱাৰ লগতে ১.১৩ লাখ লোকে ঘৰ-বাৰী এৰি আন ঠাইত আশ্রয় ল'ব লগা হৈছিল। প্রায় ৫০০ লোকে বানত প্রাণ হেৰুৱাইছিল।

ইফালে দেশখনত বিভিন্ন পক্ষৰ মাজত হৈ থকা সংঘৰ্ষৰ ঘটনাসমূহো দুর্ভিক্ষজনিত পৰিস্থিতিৰ অন্যতম কাৰণ হৈ পৰিছে। যোৱা বৰ্ষৰ জানুৱাৰীৰ পৰা জুনলৈকে দেশখনত বিভিন্ন পক্ষৰ সংঘৰ্ষৰ ফলত প্রায় ২২ লাখ লোকে ঘৰ-বাৰী এৰি স্থানান্তৰ হ'ব লগা হৈছিল। 

মূলতঃ খ্ৰীষ্টান আৰু মুছলমানৰ মাজৰ সংঘৰ্ষই দেশখনত ভয়াৱহ ৰূপ লৈ আহিছে। যাৰ ফলত জনতাৰ খাদ্য, স্বাস্থ্য আৰু অন্যান্য প্রাথমিক প্রয়োজনীয়তাসমূহ পূৰণৰ ক্ষেত্ৰত নেতিবাচক প্রভাৱ পৰিছে। উপযুক্ত খাদ্য নাপাই শিশুসকলো পুষ্টিহীনতাত ভুগিব লগা হৈছে।

উৎসঃ দৈনিক জনমভূমি