যুদ্ধক্ষেত্ৰত পৰিণত মুজিবুৰৰ গৃহ চহৰ গোপালগঞ্জ ;১৪জনক গ্ৰেপ্তাৰ, ২২ ঘণ্টীয়া সান্ধ্য আইন জাৰি

ডিজিটেল ডেস্কঃ বাংলাদেশৰ প্ৰাক্তন প্রধানমন্ত্রী শেখ হাছিনা ক্ষমতাচ্যুত হোৱাৰ পাছৰে পৰা প্ৰথমবাৰৰ বাবে হাছিনা নেতৃত্বাধীন আৱামী লীগৰ সমর্থকসকলে দেশখনত বুধবাৰে বৃহৎ প্রতিবাদ সাব্যস্ত কৰে।

 বাংলাদশেৰ প্ৰতিষ্ঠাপক শ্বেখ মুজিবুৰ ৰহমানৰ গৃহ চহৰ গোপালগঞ্জত আৱামী লীগৰ সমর্থকসকলে কৰা প্ৰতিবাদ হিংসাত্মক ঘটনালৈ পৰিণত হয়। দেশখনৰ নিৰাপত্তা বাহিনীৰে আৱামী লীগৰ সমর্থকসকলৰ সংঘৰ্ষৰ ফলত চাৰিজন লোকে প্রাণ হেৰুৱায়।

ঘটনাৰ বিৱৰণি অনুসৰি, বুধবাৰে দেশখনৰ ছাত্র নেতৃত্বাধীন নেশ্যনেল চিটিজেন পার্টিয়ে (এন চি পি) এখন জন সমাৱেশৰ আয়োজন কৰিছিল। এই সমাবেশস্থলীতে শেখ হাছিনাৰ শতাধিক সমর্থক সমৱেত হয় আৰু লগে লগে উত্তেজনা বৃদ্ধি পায়। আৰক্ষী আৰু আৱামী লীগৰ সমৰ্থকৰ মাজত সংঘৰ্ষৰ সূত্রপাত হয় আৰু এলেকাটো যুদ্ধক্ষেত্ৰলৈ পৰিণত হয়। ইয়াৰ পাছতে আৰক্ষীয়ে গুলীচালনা কৰে আৰু ঘটনাস্থলীতে দীপ্ত সাহা (২৫), ৰামজান কাজী (১৮) আৰু চোহেল (৪১)ৰ মৃত্যু হয়।

আনহাতে নজন লোকক গুৰুতৰভাৱে আহত অৱস্থাত গোপালগঞ্জ চিকিৎসালয়ত ভর্তি কৰোৱা হয়। পৰৱৰ্তী সময়ত হস্পিটেলত আৰু এজন লোকৰ মৃত্যু হয়। তাৰপাছতেই স্থানীয় প্রশাসনে পৰিস্থিতি নিয়ন্ত্ৰণৰ বাবে বি জি বিৰ চাৰিটা অতিৰিক্ত বাহিনীক মোতায়েন কৰে আৰু এন চি পিৰ কৰ্মীক আক্ৰমণ কৰা লোকসকলৰ বিৰুদ্ধে কঠোৰ ব্যৱস্থা ল'বলৈ নির্দেশ দিয়ে। মুখ্য উপদেষ্টা ইউনুছৰ কাৰ্যালয়ে বুধবাৰে ৮ বজাৰ পৰা গোপালগঞ্জত ২২ ঘণ্টীয়া সান্ধ্য আইনৰ নিৰ্দেশ দিয়ে। ইফালে, বৃহস্পতিবাৰে কালিৰ ঘটনাৰ সংক্ৰান্তত আৰক্ষীয়ে ১৪জন লোকক গ্ৰেপ্তাৰ কৰিছে।

উৎসঃ দৈনিক জনমভূমি