আমেৰিকাক পুটিনৰ সকীয়নি ; ভাৰত-চীনক দুৰ্বল কৰাৰ চেষ্টা নকৰিব

ডিজিটেল ডেস্কঃ ৰাছিয়াৰ ৰাষ্ট্ৰপতি ভ্লাডিমিৰ পুটিনে আমেৰিকাক ভাৰত আৰু চীনৰ ওপৰত বল প্রয়োগ কৰাৰ চেষ্টা নকৰিবলৈ সকীয়াই দিয়ে। 

পুটিনে কয়, 'আপোনালোকে ভাৰত আৰু চীনক তেনেধৰণে কথা ক'ব নোৱাৰে।' চীনত ছাংহাই কো-অপাৰেশ্যন অর্গেনাইজেশ্যনৰ (এছ চি অ') শীর্ষ সন্মিলন আৰু সামৰিক পেৰেডত অংশগ্রহণ কৰাৰ পাছত সাংবাদিকসকলক সম্বোধন কৰি পুটিনে অভিযোগ কৰে যে আমেৰিকাই অৰ্থনৈতিক হেঁচাক এছিয়াৰ দুই বৃহত্তম শক্তিক দুৰ্বল কৰাৰ আহিলা হিচাপে ব্যৱহাৰ কৰিছে। 

ভাৰত আৰু চীনক 'সহযোগী' আখ্যা দি পুটিনে কয় যে আমেৰিকাৰ শুল্ক ব্যৱস্থা হৈছে 'এই দুখন দেশৰ নেতৃত্বক দুৰ্বল কৰাৰ' এক প্রচেষ্টা। পুটিনে কয়, '১.৫ বিলিয়ন জনসংখ্যাৰে ভাৰত, চীন হৈছে শক্তিশালী অৰ্থনীতিৰ দেশ। তেওঁলোকৰ নিজৰ ঘৰুৱা ৰাজনৈতিক ব্যৱস্থা আৰু আইনো আছে।' 

তেওঁ আৰু কয়, 'যেতিয়া কোনোবাই কয় যে তেওঁলোকে শাস্তি দিবলৈ গৈ আছে, তেতিয়া এই কথাও ভাবিব লাগিব যে এই বৃহৎ দেশ দুখনৰ নেতৃত্বই কিদৰে প্ৰতিক্রিয়া জনাব?' ভাৰত আৰু চীনৰ বিষয়ে পুটিনে আৰু কয়, 'ইতিহাসত তেওঁলোকৰ দীর্ঘ সময় ঔপনিৱেশবাদ, তেওঁলোকৰ সাৰ্বভৌমত্বত কৰৰ দৰে কঠিন সময়ো আছিল। 

যদি তেওঁলোকৰ কোনোবাই দুৰ্বলতা প্রদর্শন কৰে, তেওঁৰ ৰাজনৈতিক জীৱনৰ আধ্যা পৰিব। সিয়ে তেওঁৰ আচৰণক প্ৰভাৱান্বিত কৰে।' পুটিনে আৰু কয় যে আমেৰিকাৰ বাগধাৰাই মান্ধাতা যুগৰ চিন্তাৰ প্ৰতিধ্বনি শুনায়। 

তেওঁ কয়, 'উপনিৱেশৰ যুগৰ অন্ত পৰিল। তেওঁলোকে উপলব্ধি কৰা উচিত যে অংশাদীৰৰ সৈতে কথা পাতোতে তেওঁলোকে সেই মেজাজেৰে কথা পাতিব নোৱাৰে।' পুটিনে আৰু কয়, 'অৱশেষত কথাবোৰৰ সমাধান ওলাব, সকলোবোৰ স্বাভাৱিকভাৱে চলিব আৰু আমি পুনৰ স্বাভাৱিক ৰাজনৈতিক আলোচনা দেখিবলৈ পাম।' 

উল্লেখযোগ্য যে ৰাছিয়াৰ তেল ক্ৰয় কৰাৰ বাবে ভাৰতে আমেৰিকাৰ উচ্চ হাৰৰ শুল্কৰ (৫০ শতাংশ) মুখামুখি হোৱা তথা চীনৰ বিৰুদ্ধে উচ্চ হাৰৰ শুল্ক আৰোপ কৰা (এতিয়াও বলৱৎ নোহোৱা)ৰ সময়তে পুটিনে এই প্রতিক্রিয়া প্রকাশ কৰে ।

উৎসঃ দৈনিক জনমভূমি