শীঘ্ৰেই ৰাছিয়া-ইউক্রেইনৰ হতাহতৰ সংখ্যা হ'ব ২০ লাখ, চাৰি বছৰৰ ভয়ংকৰ যুদ্ধৰ পৰিণতি

ডিজিটেল ডেস্ক : প্ৰায় চাৰি বছৰ ধৰি চলা ৰাছিয়া-ইউক্রেইনৰ ভয়ংকৰ যুদ্ধত দুয়োপক্ষৰ সৈন্যৰ হতাহতৰ সংখ্যা শীঘ্রেই ২০ লাখ অতিক্ৰম কৰিব। আনহাতে, দ্বিতীয় বিশ্ব যুদ্ধৰ পাছত সংঘটিত হোৱা সংঘৰ্ষবোৰৰ ভিতৰত যিকোনো প্রধান শক্তিশালী দেশৰ ক্ষেত্ৰত সর্বাধিক ক্ষতি হৈছে ৰাছিয়াৰ সৈন্যবলৰ। 

শেহতীয়াকৈ প্রকাশ হোৱা এখন প্রতিবেদনত যুদ্ধখনৰ এই ভয়ংকৰ তথ্য প্রকাশ পাইছে। আনহাতে, ৰুছ বাহিনীয়ে ইউক্রেইনত আক্রমণ অব্যাহত ৰাখিছে। বুধবাৰে কীভৰ এটা পার্শ্ববর্তী অঞ্চলত ৰুছ সেনাৰ আক্ৰমণত তিনিগৰাকী ইউক্রেইনী লোক নিহত হয়। ইফালে, 'চেণ্টাৰ ফৰ স্ট্রেটেজিক এণ্ড ইণ্টাৰনেশ্যনেল ষ্টাডিজে' (চি এছ আই এছ) মঙলবাৰে প্ৰকাশ কৰা প্ৰতিবেদনখনত কোৱা হৈছে যে দুয়োখন দেশৰ যুদ্ধত ৰাছিয়াৰ ১২ লাখ লোক হতাহত হৈছে। ইয়াৰ ভিতৰত ৩ লাখ ২৫ হাজাৰ সৈন্য নিহত হৈছে। ২০২২ চনৰ পৰা ২০২৫ চনৰ ডিচেম্বৰলৈকে চলা পূৰ্ণ পৰ্যায়ৰ যুদ্ধত মস্কো সর্বাধিক ক্ষতিগ্রস্ত হৈছে। 

আনহাতে, ৰাছিয়াৰ তুলনাত ইউক্রেইনৰ সৈন্য আৰু জনসংখ্যা কম হোৱাৰ পৰিপ্ৰেক্ষিতত এই যুদ্ধখনত ইউক্রেইনৰ ৬ লাখ লোক হতাহত হৈছে আৰু ইয়াৰ ভিতৰত ১ লাখ ৪০ হাজাৰ লোক নিহত হৈছে। শেহতীয়া বাতৰি অনুসৰি, ৰাছিয়াই বৃহস্পতিবাৰে ইউক্রেইনৰ ৰাষ্ট্ৰপতি ভল'ডিমিৰ জেলেনস্কীক শান্তি আলোচনাৰ বাবে মস্কোলৈ আহিবলৈ আহ্বান জনাইছে। ইউক্রেইনৰ সৈতে চাৰিবছৰীয়া সংঘৰ্ষৰ অৱসানৰ বাবে মার্কিন ৰাষ্ট্ৰপতি ট্রাম্পৰ প্ৰচেষ্টাৰ সৈতে সংগতি ৰাখি ৰাছিয়াই এই পদক্ষেপ লৈছে বুলি ক্রেমলিনৰ সূত্ৰই প্ৰকাশ কৰিছে।

উৎসঃ দৈনিক জনমভূমি