ডিজিটেল ডেস্কঃ দিল্লীৰ পৰিবহণ ব্যৱস্থাক অধিক মহিলা-অনুকূল আৰু প্ৰদূষণমুক্ত কৰাৰ লক্ষ্যৰে দিল্লী চৰকাৰে এক অভিলাষী পদক্ষেপ গ্ৰহণ কৰিছে।
চৰকাৰে অতি সোনকালে ৰাজধানী চহৰখনত 'ই-বাইক দিদি' আঁচনি মুকলি কৰিবলৈ সাজু হৈছে। এই আঁচনিৰ জৰিয়তে মহিলাসকলৰ যাতায়ত কেৱল সহজতৰ নহয়, বৰঞ্চ অধিক নিৰাপদ আৰু সস্তীয়া হৈ পৰিব।
'ই-বাইক দিদি' আঁচনি কি?
মূলত মহিলা যাত্ৰীসকলৰ বাবে উৎসৰ্গিত এইখন এক বিশেষ ইলেকট্ৰিক বাইক টেক্সী সেৱা। এই সেৱাৰ আটাইতকৈ গুৰুত্বপূৰ্ণ দিশটো হ’ল যে ইয়াৰ চালক আৰু যাত্ৰী— দুয়ো পক্ষই কেৱল মহিলা হ’ব। ইয়াৰ জৰিয়তে দিল্লীৰ ৰাজপথত মহিলাসকলে পুৰুষ চালকৰ বাইকত উঠিবলৈ কৰা দ্বিধাবোধ দূৰ হ’ব।
আঁচনিখনৰ মুখ্য আকৰ্ষণসমূহ:
মহিলা সৱলীকৰণ: এই আঁচনিৰ অধীনত হাজাৰ হাজাৰ মহিলাক ই-বাইক চলোৱাৰ প্ৰশিক্ষণ দিয়া হ’ব আৰু তেওঁলোকক কৰ্মসংস্থাপনৰ সুযোগ দিয়া হ’ব।
লাষ্ট মাইল কানেক্টিভিটি: মেট্ৰ’ ষ্টেচন বা বাছ আস্থানৰ পৰা ঘৰলৈ বা কাৰ্যালয়লৈ যোৱাৰ ক্ষেত্ৰত থকা যাতায়তৰ সমস্যা এই ই-বাইক সেৱাই দূৰ কৰিব।
পৰিৱেশ সুৰক্ষা: সম্পূৰ্ণৰূপে বেটাৰীচালিত হোৱাৰ বাবে এই বাইকসমূহে দিল্লীৰ বায়ু প্ৰদূষণ ৰোধ কৰাত সহায় কৰিব।
নিৰাপত্তা ব্যৱস্থা: সকলো ই-বাইকতে জি.পি.এছ. (GPS) আৰু জৰুৰীকালীন বুটাম সংযুক্ত থাকিব, যাৰ পোনপটীয়া সংযোগ আৰক্ষী নিয়ন্ত্ৰণ কক্ষৰ সৈতে থাকিব।
কেনেকৈ কৰিব বুকিং?
চৰকাৰে জনোৱা মতে, এই সেৱা গ্ৰহণ কৰিবলৈ মহিলাসকলে এটা নিৰ্দিষ্ট মোবাইল এপ্লিকেচন ব্যৱহাৰ কৰিব লাগিব।
প্ৰথমে এপটোত পঞ্জীয়ন কৰিব লাগিব।
নিজে যোৱা ঠাইখন (Destination) নিৰ্বাচন কৰিলে ওচৰতে থকা 'ই-বাইক দিদি'ৰ চালিকাৰ তথ্য ওলাই পৰিব।
অত্যন্ত কম ভাড়াত মহিলা যাত্ৰীসকলে নিজৰ গন্তব্য স্থানলৈ যাব পাৰিব।
দিল্লী চৰকাৰৰ মতে, এই আঁচনিৰ জৰিয়তে অহা কেইমাহমানৰ ভিতৰত হাজাৰ হাজাৰ ই-বাইক দিল্লীৰ ৰাজপথত নমোৱা হ’ব। ইয়াৰ দ্বাৰা ছাত্ৰী আৰু কৰ্মৰত মহিলাসকল আটাইতকৈ বেছি উপকৃত হ’ব।
Continue Reading
