শ্রীহৰিকোটাৰ পৰা উৎক্ষেপণ বিশ্বৰ ব্যয়বহুল আর্থ ইমেজিং ছেটেলাইট

ডিজিটেল ডেস্কঃ বিশ্বৰ আটাইতকৈ ব্যয়বহুল আর্থ ইমেজিং ছেটেলাইট নিছাৰ (নাছা-ইছৰ' ছিন্থেটিক এপাচাৰ ৰাডাৰ ছেটেলাইট) বুধবাৰে অন্ধ্র প্রদেশৰ শ্রীহৰিকোটাৰ পৰা উৎক্ষেপণ কৰা হয় আৰু এই উপগ্ৰহটো কক্ষপথত সফলতাৰে সংযুক্ত কৰা হৈছে।

বুধবাৰে সন্ধিয়া ৫-৪০ বজাত ভাৰতীয় মহাকাশ গবেষণা সংস্থা (ইছৰ') আৰু মার্কিন মহাকাশ সংস্থা নাছাৰ সহযোগত ১.৩ বিলিয়ন ডলাৰ মূল্যৰ ছেটেলাইটটো কঢ়িয়াই নিয়া জি এছ এল ভি-এফ ১৬ ৰকেটটোক উৎক্ষেপণ কৰা হয়।

এয়া হৈছে দুয়োটা মহাকাশ সংস্থাৰ প্ৰথমটো সহযোগিতামূলক কার্য। ইছৰ'ৰ অধ্যক্ষ ড° ভি নাৰায়ণনে উৎক্ষেপণৰ পাছত সাংবাদিকক কয় যে এই উৎক্ষেপণ, ছেটেলাইট প্রযুক্তিত নেতৃত্বৰ ভূমিকা গ্ৰহণৰ ক্ষেত্ৰত ভাৰতৰ এক বৃহৎ পদক্ষেপ।

তেওঁ এইদৰে কয়, '১৯৭৫ চনত ভাৰতৰ প্ৰথম কৃত্রিম উপগ্রহ আর্যভট্ট প্ৰেৰণ কৰোতে দেশে ছেটেলাইট প্ৰযুক্তিৰ বাবে অন্য দেশৰ ওপৰত নিৰ্ভৰ কৰিবলগীয়া হৈছিল, আমি বর্তমান পর্যায়ক্রমে এটা নেতৃত্বৰ ভূমিকা গ্রহণ কৰিছোঁ...।' প্রায় এটা দশক ধৰি নিৰ্মাণ কৰা এই ছেটেলাইটোৰ অভিযান জীৱন ৫ বছৰ হোৱাৰ সম্ভাৱনা আছে।

ই প্রত্যেক ৯৭মিনিটত এবাৰকৈ পৃথিৱীৰ কক্ষপথত প্রদক্ষিণ কৰিব আৰু পৃথিৱীৰ ভূ-পৃষ্ঠৰ আলোকচিত্ৰ আৰু সমুদ্র পৃষ্ঠৰ কিছু অংশৰ ছবি প্রত্যেক ১২ দিনৰ মূৰে মূৰে প্ৰেৰণ কৰিব। এই অনন্য ছেটেলাইটোৱে প্রাকৃতিক দুর্যোগৰ পূর্বানুমান কৰা আৰু সতর্কবাণীৰে জীৱৰ প্ৰাণ ৰক্ষা কৰি যুগান্তকাৰী পৰিৱৰ্তন সাধন কৰিব।

উৎসঃ দৈনিক জনমভূমি