চলন্ত ৰে’লৰ ওপৰত ভাঙি পৰিল ক্ৰেন, ২২গৰাকীয়ে হেৰুৱালে প্ৰাণ

ডিজিটেল ডেস্ক : থাইলেণ্ডত সংঘটিত হৈছে এক ভয়ংকৰ ৰে’ল দুৰ্ঘটনা। আজি পুৱাৰ ভাগত দুৰ্ঘটনাত পতিত হয় এখন যাত্ৰীবাহী ৰে’ল। য’ত কমেও ২২ জন লোকৰ মৃত্যু হৈছে। জানিব পৰা মতে এখন ক্ৰেন ভাঙি ৰে’লখন লাইনচ্যুত হয়। থাইলেণ্ডৰ ৰাজধানীৰ পৰা দেশৰ উত্তৰ-পূব অংশলৈ গৈ আছিল ৰে’লখন। 

 আজি পুৱা প্ৰায় ৯ বজাত সিখিয়ো জিলাত ৰে’লপথৰ সমীপতে নিৰ্মাণ কাৰ্যত ব্যৱহাৰ কৰা এখন ক্ৰেন বাগৰি পৰে ৰে’লখনৰ ওপৰত। তাৰপিছত লাইনচ্যুত হৈ দুৰ্ঘটনাত পতিত হয় যাত্ৰীবাহী ৰে’লখন। লাইনচ্যুত হোৱাৰ পিছতে ৰে’লখনত অগ্নিকাণ্ড সংঘটিত হয়। ইতিমধ্যে স্থানীয় আৰক্ষী আৰু উদ্ধাৰকাৰী দলে উদ্ধাৰ অভিযানত অব্যাহত ৰাখিছে। আৰক্ষীয়ে জনোৱা মতে, অগ্নিকাণ্ড নিয়ন্ত্ৰণ কৰি উদ্ধাৰ অভিযান অব্যাহত আছে। আনহাতে ৩০ জনতকৈ অধিক যাত্ৰী আহত হয়, বহুকেইজন লোক গাড়ীৰ ভিতৰত আবদ্ধ হৈ পৰে। 

 উল্লেখযোগ্য যে উক্ত ৰে’লখনত প্ৰায় ১৯৫গৰাকী যাত্ৰীয়ে যাত্ৰা কৰি আছিল। থাইলেণ্ড চৰকাৰে এই সমগ্ৰ দুৰ্ঘটনা সন্দৰ্ভত এক তদন্ত আৰম্ভ কৰিবলৈও নিৰ্দেশ প্ৰদান কৰিছে। ইফালে ৰে’লখনৰ ডবা কাটি উদ্ধাৰকাৰী দলে আহতসকলক উদ্ধাৰ কৰিবলগীয়া হয়। থাইলেণ্ড আৰক্ষীয়ে এক বিবৃতিযোগে ২২ জন লোকৰ মৃত্যু হোৱা বুলি নিশ্চিত কৰিছে। এই দুৰ্ঘটনাত ৭৯ জন লোক আহত হোৱাৰ বিপৰীতে আহত ৮ জনৰ অৱস্থা সংকটজনক।

উৎসঃ দৈনিক জনমভূমি