ডিজিটেল ডেস্ক: ভাৰতবৰ্ষ নিজৰ বৈচিত্ৰ্যময় সংস্কৃতি, চহকী ঐতিহ্য আৰু অনন্য ৰঙৰ বাবে বিশ্বদৰবাৰত সদায় চৰ্চিত। প্ৰতিখন চহৰৰে ইয়াত এক সুকীয়া পৰিচয় আছে।
যিদৰে ৰাজস্থানৰ ৰাজধানী জয়পুৰক ‘পিংক চিটী’ বা গোলাপী চহৰ বুলি জনা যায়, তেনেদৰে এই ৰাজ্যৰে আন এখন ঐতিহাসিক চহৰ নিজৰ ‘নীলা’ ৰূপৰ বাবে বিখ্যাত। আমি ক'ম যোধপুৰৰ কথা, যাক বিশ্বজুৰি ‘ব্লু চিটী’ (Blue City) বুলি অভিহিত কৰা হয়।
যেতিয়া কোনো পৰ্যটকে যোধপুৰৰ বিশাল মেহৰানগড় দুৰ্গৰ পৰা চহৰখনলৈ নিৰীক্ষণ কৰে, তেতিয়া তেওঁলোকৰ চকুৰ সন্মুখত কেৱল নীলা ৰঙৰ এক বিশাল সাগৰহে যেন ভাহি আহে। কিন্তু আপুনি জানেনে, এই চহৰখনৰ ঘৰবোৰ কেৱল নীলা ৰঙৰ হোৱাৰ আঁৰত থকা ৰহস্য কি? ইয়াৰ অন্তৰালত আছে কেতবোৰ বৈজ্ঞানিক আৰু ঐতিহাসিক কাৰণ।
১/ গৰমৰ পৰা ৰক্ষা পাবলৈ এক বৈজ্ঞানিক উপায়
ৰাজস্থানৰ গ্ৰীষ্মকালৰ প্ৰচণ্ড গৰমৰ কথা সকলোৱে জানে। যোধপুৰৰ তাপমাত্ৰা প্ৰায়ে অসহনীয় হৈ পৰে। বৈজ্ঞানিক দৃষ্টিকোণৰ পৰা, নীলা ৰঙে সূৰ্যৰ ৰশ্মি প্ৰতিফলিত কৰাত সহায় কৰে। সেয়েহে, ঘৰৰ বাহিৰৰ দেৱালত নীলা ৰং সানিলে ঘৰৰ ভিতৰভাগ শীতল হৈ থাকে। একপ্ৰকাৰে এই নীলা ৰঙে প্ৰাকৃতিক ‘এয়াৰ কণ্ডিচনাৰ’ৰ দৰে কাম কৰে।
২/ উঁই আৰু পোক-পৰুৱাৰ প্ৰতিৰোধক
পুৰণি সময়ত যোধপুৰৰ ঘৰবোৰত উঁই আৰু অন্যান্য পোক-পৰুৱাৰ উপদ্ৰৱ বহুত বেছি আছিল। এই সমস্যাৰ পৰা পৰিত্ৰাণ পাবলৈ স্থানীয় লোকে চূণৰ লগত কপাৰ ছালফেট মিহলি কৰি দেৱালত প্ৰলেপ দিছিল। এই মিশ্ৰণটো শুকোৱাৰ পিছত এক উজ্জ্বল নীলা ৰঙৰ সৃষ্টি হৈছিল, যিয়ে কেৱল উঁই খেদাই নহয়, চহৰখনক এক অনন্য সৌন্দৰ্যও প্ৰদান কৰিছিল।
৩/ ধৰ্মীয় বিশ্বাস আৰু ঐতিহাসিক পৰম্পৰা
কিছুমান ধৰ্মীয় বিশ্বাস অনুসৰি, নীলা ৰঙৰ সম্পৰ্ক ভগৱান শিৱৰ সৈতে আছে। পুৰণি কালত যোধপুৰৰ ব্ৰাহ্মণসকলে নিজকে আনৰ পৰা পৃথককৈ দেখুৱাবলৈ আৰু শান্তিৰ প্ৰতীক হিচাপে নিজৰ ঘৰবোৰ নীলা ৰঙেৰে ৰঙাইছিল। সেইবাবেই ইয়াক পূৰ্বে ‘ব্ৰাহ্মণপুৰী’ বুলিও জনা গৈছিল। পৰৱৰ্তী সময়ত এই শৈলী গোটেই চহৰখনতে জনপ্ৰিয় হৈ পৰে।
আজি যোধপুৰৰ এই নীলা ৰং কেৱল পৰম্পৰা হৈ থকা নাই, ই চহৰখনৰ পৰ্যটনৰ এক অবিচ্ছেদ্য অংগ হৈ পৰিছে। দেশী-বিদেশী সহস্ৰাধিক পৰ্যটক কেৱল এই ‘নীলানগৰী’ৰ সৌন্দৰ্য উপভোগ কৰিবলৈকে প্ৰতি বছৰে ইয়ালৈ ঢাপলি মেলে।
Continue Reading
