ডিজিটেল ডেস্কঃ ৰাষ্ট্ৰীয় স্বয়ংসেৱক সংঘক (আৰ এছ এছ)লৈ বিতৰ্কিত মন্তব্য কৰি এতিয়া বিপদত পৰিছে বলীউডৰ প্ৰবীণ গীতিকাৰ জাভেদ আখতাৰ৷ আৰএছএছৰ বিৰুদ্ধে কৰা মন্তব্যৰ বাবেই জাভেদ আখতাৰৰ বিৰুদ্ধে জাৰি কৰা হৈছে চমন৷ কিন্তু কি কৈছিল জাভেদ আখতাৰে? আখতাৰে শেহতীয়াকৈ আৰএছএছক তালিবানৰ সৈতে তুলনা কৰিছিল। এনে মন্তব্যৰ বাবেই জাভেদ আখটাৰআইনী মেৰপেছত সোমাই পৰিছে। মুম্বাইৰ মুলুন্দ মেট্ৰ'পলিটান মেজিষ্ট্ৰেটৰ আদালতে বলীউডৰ প্ৰবীণ গীতিকাৰজনলৈ চমন জাৰি কৰিছে৷
আদালতে ২০ এপ্ৰিলত গীতিকাৰজনক গোচৰটোত হাজিৰ হ'বলৈ নিৰ্দেশ দিছিল। অৱশ্যে, তেওঁ নিৰ্ধাৰিত দিনটোত আদালতত হাজিৰ হ'ব নোৱাৰিলে। ইয়াৰ পিছতে মুলুন্দ আদালতে গীতিকাৰজনক ২০ জুনত আদালতত হাজিৰ হ'বলৈ নিৰ্দেশ দিছে।
জাভেদ আখতাৰে কৈছিল "তালিবানসকল বৰ্বৰ। তেওঁলোকৰ কাৰ্য্যবোৰ নিন্দনীয়। কিন্তু যিসকলে আৰ এছ এছ, বিশ্ব হিন্দু পৰিষদ বা বজৰং দলক সমৰ্থন কৰে তেওঁলোকও সমানে বৰ্বৰ" ৷ উল্লেখ্য জাভেদ আখটাৰৰ বিৰুদ্ধে ২০২১ চনত একে ধৰণৰ মন্তব্য কৰাৰ অভিযোগ উত্থাপন হৈছিল। সেইসময়তো তেনে মন্তব্যকলৈ বিতৰ্ক হৈছিল। প্ৰবীণ গীতিকাৰজনৰ বিৰুদ্ধে শেহতীয়াকৈ অধিবক্তা সন্তোষ দুবেৰই গোচৰ ৰুজু কৰিছিল৷ সেই গোচৰৰ ভিত্তিতে তেওঁলৈ চমন জাৰি কৰা হৈছে৷
উল্লেখ্য অধিবক্তা সন্তোষ দুবে সৰুৰে পৰা আৰ এছ এছৰ সৈতে জড়িত হৈ আছে। দুবেই কয় "জাভেদ আখটাৰে ভালদৰে জানে যে ৰাষ্ট্ৰীয় স্বয়ংসেৱক সংঘ আৰু তালিবানৰ চিন্তাধাৰা, আদৰ্শ, দৰ্শন, চিন্তা বা কাম কৰাৰ ধৰণৰ ক্ষেত্ৰত একো মিল নাই। ইয়াৰ পিছতো তেওঁ সংগঠনটোৰ ভাবমূৰ্তি কলুষিত কৰিবলৈ আৰু সংগঠনটোৰ কৰ্মীসকলক অপমান কৰিবলৈ এনে মন্তব্য কৰিছে।’’
Continue Reading
