ডিজিটেল ডেস্কঃ ধৰ্মীয় পৰিচয় লুকুৱাই ৰোষত পৰিছে এজন ভুৱা প্ৰেমিক৷উত্তৰ প্ৰদেশৰ বৰেলী জিলাত মহিলাৰ লগত বন্ধুত্ব কৰিবলৈ নিজৰ পৰিচয় লুকুৱাই ৰখাৰ অভিযোগত এজন লোকক গ্ৰেপ্তাৰ কৰিছে আৰক্ষীয়ে৷ লগতে আন এজনৰ বিৰুদ্ধে গোচৰ ৰুজু কৰা হৈছে বুলি আৰক্ষীয়ে সংবাদ মাধ্যমক জানিবলৈ দিয়ে।
২৪ বছৰীয়া এগৰাকী মহিলাই দাখিল কৰা এজাহাৰ অনুসৰি প্ৰথমে নিজকে অংকিত বুলি পৰিচয় দিয়া আবিদ নামৰ এজন লোকে তেওঁৰ লগত বন্ধুত্ব কৰি শাৰীৰিক সম্পৰ্ক স্থাপন কৰিছিল, একে সময়তে তেওঁক বিয়া কৰাব বুলি প্ৰতিশ্ৰুতি দিছিল।পাছত ইণ্টাৰনেটত ব্যক্তিগত ভিডিঅ’ আপলোড কৰাৰ ভাবুকি দি বিয়া হ’বলৈ ব্লেকমেইল কৰা আৰম্ভ কৰে৷ পাছৰ দিনবোৰত মহিলাগৰাকীক বলপূৰ্বক ধৰ্মান্তৰিত কৰি জোৰকৈ মাংস খুৱাই প্ৰেমিকজনৰ পিতৃৰ লগত অবৈধ সম্পৰ্ক স্থাপন কৰিবলৈ বাধ্য কৰা হয়।
মহিলাগৰাকীয়ে লগতে অভিযোগত উল্লেখ কৰিছে যে অভিযুক্ত লোকজনৰ পৰিয়ালৰ লোকে তেওঁক মাৰপিট কৰি ৰুমত বন্দী কৰি থৈছিল।কিন্তু কোনোমতে পলায়ন কৰি তেওঁ আৰক্ষীৰ কাষলৈ আহে৷
শুকুৰবাৰে নগৰ আৰক্ষী অধীক্ষক ৰাহুল ভাটীয়ে কয় যে অভিযোগৰ প্ৰতি লক্ষ্য ৰাখি উত্তৰ প্ৰদেশৰ অবৈধ ধৰ্মান্তৰকৰণ নিষেধাজ্ঞা আইনৰ লগতে অন্যান্য ধাৰাত গোচৰ ৰুজু কৰা হৈছে। তদন্ত চলি আছে আৰু যি তথ্য পোহৰলৈ আহে তাৰ ভিত্তিত আইনী ব্যৱস্থা গ্ৰহণ কৰা হ’ব বুলিও তেওঁ জানিবলৈ দিয়ে৷
Continue Reading
