ডিজিটেল ডেস্কঃ ওড়িশাত সংঘটিত কৰমণ্ডল এক্সপ্ৰেছৰ দুৰ্ঘটনাত এতিয়ালৈকে প্ৰায় ২৯০ গৰাকী যাত্ৰী নিহত হৈছে। আহত হৈছে সহস্ৰাধিক যাত্ৰী। বহুতে এতিয়াও যুঁজি আছে মৃত্যুৰ সৈতে। ৰে’ল খনেৰে চেন্নাইলৈ কামৰ সন্ধানত যোৱা বহু যুৱক এতিয়াও সন্ধানহীন হৈয়েই আছে।
এতিয়াও ধ্বংসপ্ৰাপ্ত বহু দবাত বহু যাত্ৰী জীৱিত অথবা মৃত অৱস্থাতে আবদ্ধ হৈ থকাৰ সন্দেহ কৰা হৈছে। পশ্চিমবংগৰ নাদিয়াৰ বাসিন্দা সুনীল হালদাৰে তেওঁৰ পুত্ৰৰ সৈতে যোগাযোগ কৰিবলৈ বহু চেষ্টা কৰি আছিল। পুত্ৰই সেই অভিশপ্ত ৰে’ল খনেৰেই চেন্নাইলৈ বুলি গৈছিল। পুত্ৰ নবীনৰ সৈতে তেওঁৰ পিতৃয়ে দুৰ্ঘটনাটোৰ পিছৰে পৰা কোনো পধ্যে যোগাযোগ কৰিবলৈ সক্ষম হোৱা নাছিল। ফলত চৰম আতংকত ভুগিছিল নবীনৰ পৰিয়ালটোৱে।
টিভিত দুৰ্ঘটনাৰ দৃশ্য, মৃতদেহৰ শাৰী দেখি কঁপি উঠিছিল নবীনৰ পৰিয়ালৰ লোকসকল। দুৰ্ঘটনাটোৰ খবৰ পোৱাৰ পিছতে চুবুৰীয়া আৰু আত্মীয়সকলেও নবীনৰ ঘৰত ভিৰ কৰিবলৈ আৰম্ভ কৰিছিল। কিন্তু হঠাতে দিনৰ ২.৪৫ বজাত নবীনৰ পিতৃৰ ফোনটো বাজি উঠে। এয়া অচিনাকী নম্বৰৰ পৰা অহা ফোন। এক মুহূৰ্তও নষ্ট নকৰাকৈ নবীনৰ পিতৃয়ে ফোনটো ৰিচিভ কৰে।
সিফালৰ পৰা ভাঁহি আহিল নবীনৰ দুৰ্বল কণ্ঠস্বৰ "মই জীয়াই আছোঁ, দেউতা!" পুত্ৰৰ মাতটো শুনি পিতৃ সুনীলে কান্দোন ৰখাব নোৱাৰিলে। ফোনটোত তেওঁ বেছি কথা পাতিবও নোৱাৰিলে। হঠাতে ফোনটো কাটি গ’ল। হয়তো নবীনে আন কাৰোবাৰ মোবাইল ফোনৰ পৰা ফোন কৰিছিল। নবীনৰ সৈতে কামৰ সন্ধানত যোৱা বহু কেইজন যুৱকৰ এতিয়ালৈকে কোনো সন্ধান ওলোৱা নাই। নবীনো হয়তো আহত হৈ ক’ৰবাত পৰি ৰৈছে।
Continue Reading
