ডিজিটেল ডেস্কঃ ইউক্ৰেইন যদি নাটোত অন্তৰ্ভূক্ত হয়, তেন্তে তৃতীয় বিশ্বযুদ্ধ হ’ব! এই চাঞ্চল্যকৰ বক্তব্য প্ৰদান কৰিছে ৰাছিয়াৰ চিকিউৰিটী কাউন্সিলৰ উপ সম্পাদক আলেক্সেণ্ডাৰ ভেনেডিক্টভে।
ৰাছিয়াই ইউক্ৰেইনত সংহাৰলীলনা চলাই থকা অৱস্থাতে আমেৰিকা যুক্তৰাষ্ট্ৰ নেতৃত্বাধীন নৰ্থ আথলাণ্টিক ট্ৰিটী অৰ্গেনাইজেচন, চমুকৈ নাটোৰ প্ৰসংগ উত্থাপিত হৈছে। নাটোত ইউক্ৰেইনত অন্তৰ্ভূক্ত কৰাক লৈ চৰ্চা চলিছে।
ইউক্ৰেইনেও নাটোৰ সদস্যপদৰ বাবে আবেদন কৰিছে। সদস্যপদ লাভ কৰিবলৈ নাটোৰ সদস্য হিচাপে থকা ৩০খনকৈ দেশৰ সমৰ্থন লাগিব। কিন্তু বহুকেইখন দেশে ইয়াক অস্বীকাৰ কৰি আহিছে। পৰিপ্ৰেক্ষিতত বৰ্তমানলৈকে ইউক্ৰেইনে নাটোৰ সদস্যপদ লাভ কৰা নাই।
ৰাছিয়াৰ এটা সংবাদ সংস্থা টাছ (TASS)ত প্ৰকাশ পোৱা বাতৰি অনুযায়ী, ৰাছিয়াৰ চিকিউৰিটী কাউন্সিলৰ উপ সম্পাদক ভেনেডিক্টভে সেয়ে কৈছে যে নাটোত ইউক্ৰেইনৰ অন্তৰ্ভূক্তি মানেই ৰাছিয়া-ইউক্ৰেইন সংঘাতে তৃতীয় বিশ্বযুদ্ধৰ পৰ্যায়লৈ গতি কৰাটোকে বুজাব।
নাটোৰ সদস্যপদ লাভ কৰিবলৈ ইউক্ৰেইনৰ আবেদনক পশ্চিমীয়া দেশসমূহৰ এটা প্ৰপাগাণ্ডা বুলি অভিহিত কৰি ভেনেডিক্টভে কয় যে নাটোৰ সদস্য দেশসমূহেও বুজি পায় যে এই কাম আত্মহত্যাসদৃশ হ’ব।
পৰমাণু যুদ্ধ সম্পৰ্কেও তেওঁ গুৰুত্বপূৰ্ণ ভাষ্য প্ৰদান কৰিছে। কয় যে শেহতীয়াকৈ ইউক্ৰেইনৰ ৰাষ্ট্ৰপতি ভ্লাদিমিৰ জেলেনস্কীয়ে ৰাছিয়াৰ বিৰুদ্ধে ক্ষীপ্ৰ আক্ৰমণৰ হুংকাৰ দিছে যদিও মনত ৰখা ভাল যে পৰমাণু যুদ্ধ সমগ্ৰ বিশ্ববাসীৰ বাবে ভাবুকিস্বৰূপ।
Continue Reading
