“ৰাছিয়াই আমাক পৃথিৱীৰ পৰা নিঃশ্চিন্ন কৰিব বিচাৰিছে।”- ৰাছিয়াৰ আক্ৰমণৰ প্ৰতিক্ৰিয়া ব্যক্ত কৰিলে জেলেনস্কীয়ে

ডিজিটেল ডেস্কঃ “ৰাছিয়াই আমাক পৃথিৱীৰ পৰা নিঃশ্চিন্ন কৰিব বিচাৰিছে।”- এই অনুভৱ ব্যক্ত কৰিছে ইউক্ৰেইনৰ ৰাষ্ট্ৰপতি ভলডিমিৰ জেলেনস্কীয়ে। সোমবাৰে জেলেনস্কীয়ে কয় যে ইউক্ৰেইনৰ কেইবাখনো চহৰত যুদ্ধৰ পৰিস্থিতি সৃষ্টি কৰি ৰাছিয়াই তেওঁৰ দেশখনক ধ্বংস কৰিব বিচাৰিছে।

টেলিগ্ৰাম মেছেজিং এপৰ জৰিয়তে দিয়া এই আৱেগিক ভাষ্যটোত জেলেনস্কীয়ে যুদ্ধবিদ্ধস্ত কেইবাখনো ইউক্ৰেইনৰ চহৰৰ নাম উল্লেখ কৰিছে। সোমবাৰেও এই চহৰসমূহত ৰাছিয়াৰ তাণ্ডৱলীলা অব্যাহত আছে। জেলেনস্কীয়ে কয় যে এই আক্ৰমণত ৰাছিয়াই ইৰাণীয়ান ড্ৰোন ব্যৱহাৰ কৰিছে।

জানিব পৰামতে, বৰ্তমানলৈকে ৰাছিয়াই ইউক্ৰেইনৰ কেইবাখনো চহৰলৈ কমেও ৭৫টাকৈ মিছাইল নিক্ষেপ কৰিছে। এই চহৰসমূহৰ ভিতৰত ৰাজধানী কিয়েভো অন্যতম।

ৰাছিয়াৰ শেহতীয়া আক্ৰমণত শতাধিক লোক আহত হোৱাৰ উপৰিও ৰাজধানী কিয়েভত বৰ্তমানলৈকে আঠজন লোকে প্ৰাণ হেৰুৱাইছে। এই শেহতীয়া আক্ৰমণক যুদ্ধৰ প্ৰথম সপ্তাহৰ বিধ্বংসী আক্ৰমণৰ স’তে তুলনা কৰা হৈছে।

জেলেনস্কীয়ে কয় যে মিছাইল নিক্ষেপৰ দ্বাৰা ৰাছিয়াই ইউক্ৰেইনৰ আন্তঃগাঁঠনি আৰু জনসাধাৰণক লক্ষ্য কৰি লৈছে। পোনপ্ৰথমে দেশখনৰ আন্তঃগাঁঠনি আৰু তাৰপাছতে জনসাধাৰণক ৰাছিয়াই লক্ষ্য কৰিছে বুলি তেওঁ কয়।

ইয়াৰ বিপৰীতে, ৰাছিয়াৰ ৰাষ্ট্ৰপতি ভ্লাদিমিৰ পুটিনে ইউক্ৰেইনৰ ওপৰত ধাৰাসাৰ ভাবুকি প্ৰদান কৰি আহিছে। কৈছে যে যদি ৰাছিয়াৰ বিৰুদ্ধে ‘সন্ত্ৰাসবাদী’ কাৰ্যকলাপ অব্যাহত থাকে, তেন্তে ৰাছিয়াই প্ৰতিৰোধী ব্যৱস্থা অব্যাহত ৰাখিব।

আনহাতে, ইউক্ৰেইনৰ ওপৰত ৰাছিয়াৰ এই আক্ৰমণক ইউৰোপৰ বহুকেইখন দেশে গৰিহণা জনাইছে। ইউৰোপীয়ান ইউনিয়নে ৰাছিয়াৰ কাৰ্যকলাপক ‘যুদ্ধ অপৰাধ’ বুলি অভিহিত কৰিছে।

ফ্ৰান্স, জাৰ্মানী, পোলেণ্ড, ইংলেণ্ড আদি দেশসমূহে ৰাছিয়াৰ আক্ৰমণক বন্য বুলি অভিহিত কৰিছে। দেশকেইখনে ইউক্ৰেইনৰ ৰাষ্ট্ৰপতি জেলেনস্কীৰ স’তে যোগাযোগ অব্যাহত ৰাখিছে।