ডিজিটেল ডেস্কঃ ৰাছিয়া-ইউক্ৰেইনৰ মাজত এবছৰৰো অধিককাল ধৰি চলি থকা যুদ্ধ কেৱল ভাৰতৰ প্ৰধানমন্ত্ৰী নৰেন্দ্ৰ মোদীয়েহে বন্ধ কৰিব পাৰিব। এই মন্তব্য আমেৰিকাৰ। আমেৰিকা যুক্তৰাষ্ট্ৰই এই বুলি কৈছে যে ইউক্ৰেইনত শান্তি স্থাপনৰ বাবে ভাৰতে গ্ৰহণ কৰা পদক্ষেপক দেশ খনে আদৰণি জনাব।
আমেৰিকা যুক্তৰাষ্ট্ৰৰ বিদেশ বিভাগৰ মুখপাত্ৰ মেথিউ মিলাৰে সাংবাদিকক কয় যে ৰাছিয়াই ইউক্ৰেইন আক্ৰমণ কৰি এটা "কৌশলগত ভুল" কৰিছে। কিন্তু যদি আন্তৰ্জাতিক সম্প্ৰদায়ে ইউক্ৰেইনলৈ শান্তি আনিবলৈ সহায়ৰ হাত আগবঢ়াব বিচাৰে, আমেৰিকা যুক্তৰাষ্ট্ৰই সকলোৰে অৱদান গ্ৰহণ কৰিব। ৰাছিয়া-ইউক্ৰেইন যুদ্ধৰ আৰম্ভণিৰ পৰাই ভাৰতে শান্তিপূৰ্ণ আলোচনাৰ জৰিয়তে সমস্যাটো সমাধান কৰাৰ প্ৰস্তাৱ আগবঢ়াই আহিছে ।সেয়েযুদ্ধ বন্ধ কৰাৰ ক্ষেত্ৰত মোদীয়ে গুৰুত্বপূৰ্ণ ভূমিকা পালন কৰিব পাৰে বুলি মাৰ্কিন কূনীতিকগৰাকীয়ে কয়।
তেওঁ কয় যে প্ৰধানমন্ত্ৰী নৰেন্দ্ৰ মোদীয়ে ৰাছিয়া আৰু ইউক্ৰেইন দুয়োৰে মুৰব্বীৰ সৈতে কেইবাবাৰো ফোনত কথা পাতিছে। যোৱা বছৰ মোদীয়ে ছাংহাই সহযোগিতা সংস্থাৰ (এছচিঅ') সন্মিলনৰ সময়ত ভ্লাদিমিৰ পুটিনৰ সৈতে দ্বিপাক্ষিক বৈঠক কৰিছিল। ৰাছিয়াৰ ৰাষ্ট্ৰপতিলৈ এক স্পষ্ট বাৰ্তাত মোদীয়ে কৈছিল যে এয়া যুঁজ কৰাৰ সময় নহয়। ভাৰতে বিভিন্ন ক্ষেত্ৰত নিৰপেক্ষ স্থিতি গ্ৰহণ কৰি যুদ্ধ বন্ধ কৰিবলৈ আহ্বান জনাইছে।
আমেৰিকা যুক্তৰাষ্ট্ৰৰ বিদেশ বিভাগৰ মুখপাত্ৰক প্ৰশ্ন কৰা হৈছিল যে ৰাছিয়া-ইউক্ৰেইন যুদ্ধ বন্ধ কৰাত নৰেন্দ্ৰ মোদী বা ভাৰতৰ কোনো ভূমিকা থাকিব পাৰে নেকি? "আমেৰিকা যুক্তৰাষ্ট্ৰই ভাৰত বা আন যিকোনো দেশৰ সহায়ক স্বাগতম জনাব," মিলাৰে উত্তৰ দিছিল। তেওঁ লগতে কয় যে ইউক্ৰেইনৰ সাৰ্বভৌমত্ব আৰু অখণ্ডতাক সন্মান জনাই শান্তি পুনৰুদ্ধাৰ কৰিব লাগিব। এই কামত সকলোৰে অৱদান গ্ৰহণযোগ্য।
এয়াই প্ৰথম বাৰৰ বাবে নহয়, আমেৰিকাই পূৰ্বেও ৰাছিয়া-ইউক্ৰেইনৰ যুদ্ধ বন্ধ কৰিবলৈ ভাৰতৰ সহায় বিচাৰিছিল। হোৱাইট হাউচৰ মুখপাত্ৰ জন কাৰ্বিয়ে কৈছিল ’’প্ৰধানমন্ত্ৰী মোদীয়ে পুটিনক সৈমান কৰিব পাৰে। যদি মোদীয়ে কথা পাতিব বিচাৰে বা আন কোনো ধৰণৰ প্ৰচেষ্টা কৰিব বিচাৰে, আমি তেওঁক সমৰ্থন কৰিম। "
Continue Reading
