ডিজিটেল ডেস্কঃ সাক্ষ্য দিবলৈ আদালতলৈ অনা হৈছিল। কিন্তু ভিৰৰ সুযোগ লৈ এটি বান্দৰ পোৱালি পলাই গ’ল। আৰু পাকিস্তানৰ কৰাচীৰ আদালত চৌহদত সেই সৰু বান্দৰটোক লৈ যথেষ্ট হুলস্থুলৰ সৃষ্টি হয়।
জানিব পৰা মতে, ১৪টা বান্দৰৰ পোৱালিক লৈ চোৰাং সৰবৰাহ কৰি থকা অৱস্থাত দুজন লোকক আৰক্ষীয়ে ধৰিছিল। আদালতত হাজিৰ হ’বলৈ অনা হৈছিল পোৱালিকেইটা। কিন্তু সাক্ষ্য দিয়াৰ সলনি এটি বান্দৰ পোৱালিয়ে পুলিচ আৰু আদালতৰ কৰ্মীৰ চকুত ধূলী দি পলায় যায়।
যোৱা বৃহস্পতিবাৰে আৰক্ষীয়ে কৰাচীৰ উপকণ্ঠ অঞ্চলৰ পৰা ১৪টা বান্দৰৰ পোৱালি সৰবৰাহ কৰাৰ অভিযোগত দুজন লোকক গ্ৰেপ্তাৰ কৰিছিল। শুকুৰবাৰে কৰাচী আদালতত হাজিৰ কৰোৱা হয় দুয়োকে। সেই সময়ত জব্দ কৰা বান্দৰৰ পোৱালিবোৰো অনা হৈছিল।
তাৰ মাজৰে এটা বান্দৰৰ পোৱালি পলায়ন কৰে। আদালত স্তম্ভিত হৈ পৰিল। বান্দৰৰ পোৱালিটোৱে বেৰৰ ওপৰেৰে, ছাদৰ সিপাৰে আৰু গছ এজোপাৰ ওপৰেৰে জপিয়াই পলায় যায়।
উল্লেখ্য যে বন্যপ্ৰাণী ৰখাটো পাকিস্তানত অবৈধ। কিন্তু আইনক বুঢ়া আঙুলি দেখুৱাই বন্যপ্ৰাণী সৰবৰাহ চলি আছে। প্ৰশ্নোত্তৰ শুনানিৰ অন্তত শুকুৰবাৰে আদালতে গ্ৰেপ্তাৰ হোৱা লোক দুজনক এক লাখ টকাৰ জৰিমনা বিহে। আদালতে বান্দৰৰ পোৱালিকেইটা কৰাচী চিৰিয়াখানা কৰ্তৃপক্ষক গতাই দিবলৈও নিৰ্দেশ দিয়ে।
অৱশ্যে আদালতৰ এই নিৰ্দেশক সমালোচনা কৰিছে পাকিস্তানৰ পশুপ্ৰেমীসকলে। তেওঁলোকে দাবী কৰে যে পাকিস্তানৰ চিৰিয়াখানাসমূহৰ অৱস্থা দুখজনক। তাত ৰাখিলে বান্দৰৰ মৃত্যু নিশ্চিত। ইছলামবাগ চিৰিয়াখানাখনো অপব্যৱস্থাপনাৰ বাবে ২০২০ চনত বন্ধ কৰাৰ নিৰ্দেশ দিয়ে আদালতে।
Continue Reading
