ডিজিটেল ডেস্ক: পঞ্জাবত সদ্যসমাপ্ত বিধানসভা নিৰ্বাচনত চমকপ্ৰদ বিজয়ৰ পাছত এইবাৰ আম আদমী পাৰ্টীৰ লক্ষ্য হৈ পৰিছে গুজৰাট৷ গুজৰাট দখলৰ লক্ষ্যৰে ৰাজনৈতিক কুচকাৱাজ আৰম্ভ কৰিছে আম আদমী পাৰ্টীয়ে৷ গুজৰাটত ৰাজনৈতিক অনুশীলনৰ অংশস্বৰূপে দুদিনীয়া ভ্ৰমণসূচীৰে গুজৰাটত উপস্থিত হৈছেগৈ দিল্লীৰ মুখ্যমন্ত্ৰী অৰবিন্দ কেজৰিৱাল আৰু পঞ্জাবৰ মুখ্যমন্ত্ৰী ভগৱন্ত মান৷
চলিত বছৰৰ ডিচেম্বৰত অনুষ্ঠিত হ’বলগীয়া নিৰ্বাচনৰ পৰিপ্ৰেক্ষিতত এতিয়াৰে পৰাই প্ৰস্তুতি আৰম্ভ কৰিছে দলটোৱে৷ আঢ়ৈ দশকজুৰি বিজেপিৰ হাতত থকা ৰাজ্যখন যিকোনো প্ৰকাৰে আম আদমী পাৰ্টীৰ দখললৈ আনিবলৈ যৎপৰোনাস্তি চেষ্টা অব্যাহত ৰাখিছে অৰবিন্দ কেজৰিৱালে৷
অৰবিন্দ কেজৰিৱাল আৰু ভগৱন্ত মানে আজি আহমেদাবাদত উপস্থিত হৈ সবৰমতী আশ্ৰম পৰিদৰ্শন কৰে।
শুকুৰবাৰে নিশা আম আদমী পাৰ্টিৰ (আপ) দুয়োজন নেতা চহৰখনত উপস্থিত হৈছিল।
তেওঁলোকৰ বিজেপি শাসিত গুজৰাট ভ্ৰমণক গুজৰাট বিধানসভা নিৰ্বাচনৰ পূৰ্বে তেওঁলোকৰ দলৰ বাবে ভিত্তি প্ৰস্তুত কৰাৰ প্ৰয়াস হিচাপে দেখা গৈছে। কেজৰিৱাল আৰু মানে ‘হৃদয়কুঞ্জ’ ভ্ৰমণ কৰিছিল৷ তেওঁলোকে মহাত্মা গান্ধীৰ সবৰমতী আশ্ৰমত উপস্থিত হৈ তাত থকা সংগ্ৰহালয়সমূহো পৰিদৰ্শন কৰে আৰু গান্ধীজীৰ প্ৰতিমূৰ্তিৰ সন্মুখত নমস্কাৰ জনোৱাৰ জনোৱাৰ ফটো ছ’চিয়েল মিডিয়াত ভাইৰেল হৈ পৰিছে৷
সাংবাদিকৰ সৈতে বাৰ্তালাপ কৰি কেজৰিৱালে কয় দিল্লীৰ মুখ্যমন্ত্ৰী হোৱাৰ পিছত এয়া তেওঁৰ প্ৰথম সবৰমতী আশ্ৰম ভ্ৰমণ। তেওঁ লগতে কয়, আগতে যেতিয়া মই এজন কৰ্মী আছিলোঁ, মই কেইবাবাৰো এই ঠাইখন পৰিদৰ্শন কৰিছিলোঁ৷ তেওঁ কয়, যেতিয়াই মই ইয়ালৈ আহো, মই মানসিক প্ৰশান্তি লাভ কৰো৷
কেজৰিৱাল আৰু মানে আজি সন্ধিয়া চহৰখনৰ পূব অঞ্চলত দুই কিলোমিটাৰজোৰা ৰোড শ্ব’ অনুষ্ঠিত কৰাৰ কথা আছে৷
ইফালে, তামিলনাডুৰ মুখ্যমন্ত্ৰী এমকে ষ্টেলিনে শুকুৰবাৰে কয় যে তেওঁৰ চৰকাৰে দিল্লীৰ দৰে দক্ষিণৰ ৰাজ্যখনত এখন মডেল স্কুল সৃষ্টি কৰিব আৰু অৰবিন্দ কেজৰিৱালক ইয়াক পৰিদৰ্শন কৰিবলৈ আমন্ত্ৰণ জনাব। ষ্টেলিনে অৰবিন্দ কেজৰিৱালৰ সৈতে বিনোদ নগৰৰ ৰাজকিয়া সৰ্বোদয় বল বিদ্যালয় পৰিদৰ্শন কৰিছিল য’ত বিষয়াসকলে তামিলনাডুৰ মুখ্যমন্ত্ৰীক আপ চৰকাৰৰ অধীনত চহৰখনৰ শিক্ষা ব্যৱস্থাৰ পৰিৱৰ্তনৰ বিষয়ে অৱগত কৰিছিল।
Continue Reading
