ডিজিটেল ডেস্কঃ পাকিস্তানী মহিলাৰ প্ৰেম কাহিনীয়ে এতিয়া যেন নতুন পাক লৈছে। উত্তৰ প্ৰদেশৰ এটিএছে পাকিস্তানৰ পৰা ভাৰতলৈ পলাই আহি ভাৰতীয় যুৱকৰ সৈতে থাকিবলৈ লোৱা সীমা হাইদৰক নিৰন্তৰ জেৰা চলাই আছে।
এটিএছে সন্দেহ কৰিছে যে পাকিস্তানী মহিলাগৰাকী দেশ খনৰ চোৰাংচোৱা সেৱাৰ সৈতে জড়িত হ'ব পাৰে। উত্তৰ প্ৰদেশৰ এটিএছ বিষয়াসকলে বিভিন্ন সূত্ৰৰ জৰিয়তে লাভ কৰা তথ্য পোৱাৰ পিছতে সন্দেহ বৃদ্ধি পাইছে। মহিলাগৰাকীৰ ভায়েক আৰু আন আত্মীয় পাকিস্তানৰ সেনাত কাম কৰি আছে। ইয়াৰ উপৰি সীমাই ভাৰতলৈ আহিবলৈ দীৰ্ঘদিন ধৰি পৰিকল্পনা কৰাৰ পিছত গাওঁলীয়া মহিলাৰ ছদ্মবেশ লৈছিল বুলি সন্দেহ কৰা হৈছে।
খবৰ অনুসৰি সীমা ইতিমধ্যে কেইবাজনো ভাৰতীয়ৰ সৈতে পৰিচিত । সীমাই সলসলীয়াকৈ ইংৰাজী ক’ব পাৰে বুলিও জানিব পৰা গৈছে। আদুনিকা সীমাই গাওঁলীয়া মহিলাৰ ভাও দিবলৈ বহুদিন ধৰি প্ৰশিক্ষণ লৈছিল বুলিও খবৰ পোৱা গৈছে।
চোৰাংচোৱা বিষয়াসকলৰ মতে, সীমা প্ৰকৃততে যথেষ্ট শিক্ষিত আৰু ভাল ইংৰাজী কয়। তেওঁ চহৰীয়া জীৱনত অভ্যস্ত। কিন্তু ভাৰতলৈ অহাৰ আগতে তেওঁ নিজকে সম্পূৰ্ণৰূপে সলনি কৰি পেলাইছিল। সীমাই তেওঁৰ চাৰিটা সন্তানকো প্ৰশিক্ষণ দিছিল বুলি জানিব পৰা গৈছে।
বিষয়াসকলৰ মতে শচীন নামৰ এজন ভাৰতীয় যুৱকক লগ পোৱাৰ আগতেই সীমাই বহু ভাৰতীয়ক চিনি পাইছিল। তেওঁলোকৰ বহুতেই দিল্লীৰ বাসিন্দা । সীমাৰ ফোনটো ইতিমধ্যে জব্দ কৰা হৈছে। তাৰ পৰা কেইবাটাও ফোন নম্বৰ উদ্ধাৰ কৰা হৈছে। ফোন নম্বৰবোৰ বৰ্তমান অনুসন্ধানৰ বাবে গ্ৰহণ কৰা হৈছে।
Continue Reading
