ডিজিটেল ডেস্কঃ উত্তৰাখণ্ডৰ অলকানন্দা নদীৰ পাৰত সংঘটিত হৈছে এক শোকাবহ ঘটনা। 'নমামি গংগা' প্ৰকল্পত ট্ৰেন্সফৰ্মাৰ বিস্ফোৰণ হোৱাত কমেও ১৫ জন লোকৰ মৃত্যু ঘটাৰ বাতৰি আহিছে। নিহতসকলৰ বেছিভাগেই শ্ৰমিক। ঘটনাটোত আন বহু লোক আঘাতপ্ৰাপ্ত হৈছে। বিস্ফোৰণত এজন আৰক্ষীৰ লোকো নিহত হৈছে। পিপালকোটিৰ ভাৰপ্ৰাপ্ত আৰক্ষী বিষয়াজনে দুৰ্ঘটনাটোত প্ৰাণ হেৰুৱাইছে। তেওঁলোক আটাইকেইজন 'নমামি গংগা' প্ৰকল্পৰ সৈতে জড়িত আছিল।
মঙলবাৰে নিশা উত্তৰাখণ্ডৰ চামোলী জিলাত 'নমামি গংগা' প্ৰকল্পৰ কাম চলি থকা অৱস্থাত দুৰ্ঘটনাটো সংঘটিত হয়। আৰক্ষী আৰু উদ্ধাৰকাৰীৰ দলে দল ঘটনাস্থলীত উপস্থিত হৈ উদ্ধাৰ অভিযান আৰম্ভ কৰে। চামোলীৰ এছ পি পৰমেন্দ্ৰ ডোভালে কয় যে আহতসকলক স্থানীয় চিকিৎসালয়ত ভৰ্তি কৰোৱা হৈছে। তেওঁলোকৰ মাজৰে বহু কেইজনৰ অৱস্থা সংকটজনক।
উত্তৰাখণ্ডৰ মুখ্যমন্ত্ৰী পুষ্কৰ সিং ধামীয়ে ঘটনাটোৰ তদন্তৰ নিৰ্দেশ দিছে।ধামীয়ে কয় "ঘটনাটো অতি দুৰ্ভাগ্যজনক। উদ্ধাৰ অভিযান চলি আছে। আহতসকলক হৃষীকেশ এইমছলৈ বিমানেৰে লৈ যোৱা হৈছে। মই এটা তদন্তৰ নিৰ্দেশ দিছো। ''
উত্তৰাখণ্ড আৰক্ষীৰ অতিৰিক্ত সঞ্চালক প্ৰধানে কয়, "এজন আৰক্ষী উপ-পৰিদৰ্শক আৰু পাঁচজন গৃহৰক্ষীসহ ১৫ জন লোক বিস্ফোৰণত নিহত হৈছে। তদন্ত চলি আছে। প্ৰাথমিক অনুসন্ধানত প্ৰকাশ পাইছে যে ঘটনাস্থলীত এডাল লোৰ ৰেলিং বিদ্যুতৰ সংস্পৰ্শলৈ আহিছিল। অৱশ্যে, অনুসন্ধানৰ পিছত বিষয়টো বিতংভাৱে জনা যাব। ''
আৰক্ষীৰ সূত্ৰ অনুসৰি ট্ৰেন্সফৰ্মাৰ বিস্ফোৰণৰ ফলত অলকানন্দা নদীৰ ওপৰত থকা এখন দলঙৰ ৰেলিং বিদ্যুতৰ সংস্পৰ্শলৈ আহিছিল। বহুতে সেই দলংখনত আছিল। বৈদ্যুতিক ৰেলিঙৰ সংস্পৰ্শলৈ অহাৰ পিছত তেওঁলোক বিদ্যুৎস্পৃষ্ট হৈছিল। ঘটনাস্থলীতে বহুতৰ মৃত্যু হৈছিল।
Continue Reading
