ডিজিটেল ডেস্কঃ এক অতি বৰ্বৰ তথা নৃশংস ঘটনা সংঘটিত হৈছে। এই ঘটনাৰ কথা শুনিলে বুকু কঁপি উঠিব আপোনাৰ। ৬ মহীয়া শিশুসহ পৰিয়ালৰ ৪ জন লোকক অতি নৃশংসভাৱে হত্যা কৰি জ্বলাই দিলে দুৰ্বৃত্তই। এই শোকাৱহ ঘটনা মঙলবাৰে নিশা ৰাজস্থানৰ এখন গাঁৱত সংঘটিত হৈছে। পৰিয়ালটোৰ আটাইকেইজনকে ঘৰৰ চোতালত জুই লগাই দিয়ে দুৰ্বৃত্তই।
আৰক্ষীৰ মতে ঘটনাটো কালি নিশা চৌৰাই গাঁৱত সংঘটিত হয়। স্থানীয় বাসিন্দাসকলে পুনাৰামৰ (৫৫) ঘৰৰ পৰা ধোঁৱা ওলাই থকা দেখিছিল। ইয়াৰ পাছতেই সেই স্থানত আতংক বিয়পি পৰে আৰু তেতিয়াই আৰক্ষীক খবৰ দিছে ওচৰ-চুবুৰীয়াই।
আৰক্ষী অহাৰ পাছত পৰিয়ালটোৰ চোতালত পুনাৰাম, তেওঁৰ পত্নী ভানৱৰী (৫০) আৰু বোৱাৰী ধাপুৰ দগ্ধ মৃতদেহ উদ্ধাৰ কৰিছিল। ধাপুৰ শৰীৰৰ কাষতে পৰি আছিল ৬ মহীয়া শিশুটিৰ মৃতদেহ। সেই দৃশ্যাংশ অতি ভয়ংকৰ আছিল বুলি আৰক্ষীয়ে জনাইছে।
জানিব পৰা মতে পৰিয়ালটোৱে খেতি কৰিছিল। আৰক্ষীৰ প্ৰাথমিক তদন্তত পোহৰলৈ আহিছে যে পৰিয়ালৰ লোকসকলৰ ডিঙি কাটি চোতাললৈ অনা হৈছিল আৰু পাছত জুই লগাই দিছিল। এয়া কোনো শত্ৰুতাৰ বাবে সংঘটিত হোৱা বুলি প্ৰথম তদন্তত সন্দেহ প্ৰকাশ কৰিছে আৰক্ষীয়ে।
আৰক্ষীয়ে তদন্ত অব্যাহত ৰাখিছে যদিও এতিয়ালৈকে কোনে কিয় হত্যা কৰিলে এই সন্দৰ্ভত একো জানিবলৈ সক্ষম হোৱা নাই। হত্যাকাৰীক শীঘ্ৰেই গ্ৰেপ্তাৰ কৰাৰ দাবী জনাইছে স্থানীয়লোকে। দোষীক কঠোৰৰ পৰা কঠোৰ শাস্তি বিহাৰ দাবী তুলিছে স্থানীয় লোকসকলে। আৰক্ষীয়ে দোষীক ধৰিবৰ বাবে তদন্তত নামি পৰিছে।
Continue Reading
