আহি আছে ‘আছানী’! উত্তৰ-পূৱৰ ৰাজ্যসমূহত প্ৰবল বতাহ-বৰষুণৰ আগজাননী

ডিজিটেল ডেস্কঃ ২০২২ৰ প্ৰথমটো ঘূর্ণী বতাহৰ প্ৰভাৱত ২১ মাৰ্চ অৰ্থাৎ সোমবাৰৰ পৰা ৰাজ্যৰ বিভিন্ন প্ৰান্তত বতাহ-বৰষুণ হ'ব বুলি আগজাননী দিছে ভাৰতীয় বতৰ বিজ্ঞান বিভাগে। উত্তৰ-পূৱৰ ৰাজ্যসমূহৰ লগতে পশ্চিমবংগ, বিহাৰো এই ঘূৰ্ণী বতাহৰ কবলত পৰাৰ প্ৰৱল সম্ভাৱনা। ভাৰতীয় বতৰ বিজ্ঞান বিভাগে আগজাননী দিয়া মতে দক্ষিণ-পূব বঙ্গোপসাগৰত উৎপত্তি ঘটা ঘূর্ণী বতাহে সোমবাৰে উত্তৰ-পূবদিশে গতি কৰিব আৰু তাৰ পিছত আন্দামান আৰু নিকোবৰ দ্বীপপুঞ্জ হৈ উত্তৰদিশে আগবাঢ়িব। এই সাগৰীয় ঘূর্ণী বতাহক নাম দিয়া হৈছে 'আছানী'। আছানীয়ে আন্দামান আৰু নিকোবৰ দ্বীপপুঞ্জত ভয়ংকৰ ভূমিস্খলনৰ দৰে পৰিস্থিতিৰ সৃষ্টি কৰিব বুলি আশংকা কৰা হৈছে। দ্বীপসমূহত ধাৰাসাৰ বৰষুণ আৰু তীব্ৰ বতাহে জনসাধাৰণৰ বিস্তৰ ক্ষতিসাধন কৰাৰ প্ৰবল সম্ভাৱনা। ২৩ মাৰ্চত বংগোপসাগৰ আৰু বাংলাদেশ আৰু ম্যানমাৰ উপকূলত ৭০-৮০ কিলোমিটাৰ প্ৰতি ঘণ্টা আৰু ৯০ কিলোমিটাৰ প্ৰতি ঘণ্টালৈকে 'আছানী'য়ে গতি কৰিব। বতৰ বিজ্ঞানীসকলে মাছমৰীয়াসকলক বংগোপসাগৰ আৰু আন্দামান সাগৰ অঞ্চললৈ নাযাবলৈ সতৰ্ক কৰি দিছে।