ডিজিটেল ডেস্কঃ কংগ্ৰেছ, গান্ধী পৰিয়াল আদিৰ সৈতে ইটালীৰ নামটো বহু সময়ত বহুতৰে বাবে চৰ্চাৰ বিষয় হৈ আহিছে। শেহতীয়াকৈ গান্ধী পৰিয়ালৰ যুৱৰাজ ৰাহুল গান্ধী চৰ্চালৈ আহিছে ইটালীৰ খাদ্যৰ বাবে। উত্তৰ প্ৰদেশৰ এখন ৰেষ্টুৰেণ্টে ৰাহুল গান্ধীৰ নামেৰে 'ইটালিয়ান ডিছ'ৰ নাম ৰখাৰ বিষয়টোকলৈ এতিয়া চৰ্চা তুংগত উঠিছে।
ৰাহুল গান্ধীৰ নামেৰে বিদেশী খাদ্যৰ নাম ৰখাৰ কথাটোকলৈ স্বাভাৱিকতে কংগ্ৰেছ সুখী হ’ব লাগিছিল যদিও তেনে হোৱা নাই। বিপৰীতে কংগ্ৰেছে বিষয়টোকলৈ নেতিবাচক প্ৰতিক্ৰিয়াহে প্ৰকাশ কৰিছে।
কংগ্ৰেছৰ সৈতে ইটালীৰ সম্পৰ্কৰ বিষয়টো পৰাপক্ষত কংগ্ৰেছৰ নেতাসকলে এৰাই চলিব বিচাৰি আহিছে। কংগ্ৰেছৰ অন্তৰ্ৱতীকালীন সভানেত্ৰীৰ পদত থকা ছোনিয়া গান্ধী ইটালীমূলৰ।
ইটালীমূলৰ হোৱা বাবেই পূৰ্বে ছোনিয়া গান্ধীক প্ৰধানমন্ত্ৰীৰ ৰূপত কোনেও চাব বিচৰা নাছিল। সেয়ে ইটালীৰ গোন্ধটোক কংগ্ৰেছে নিজৰ গাৰ পৰা গুচাবলৈ চেষ্টা অব্যাহত ৰাখিছে।
এনে সময়তে উত্তৰ প্ৰদেশৰ ৰেষ্টুৰেণ্টে ৰাহুল গান্ধীৰ নামত 'ইটালিয়ান ডিছ'ৰ নাম ৰখাৰ বিষয়টোক সহজভাবে ল’ব পৰা নাই কংগ্ৰেছে।উত্তৰ প্ৰদেশৰ ৰেষ্টুৰেণ্ট খনৰ বিৰুদ্ধে সেয়ে কংগ্ৰেছে প্ৰতিবাদ কৰাৰ ভাবুকি দিছে।
উত্তৰ প্ৰদেশৰ ইটাৱাত থকা ৰেষ্টুৰেণ্ট খনৰ মেনু কাৰ্ডত দলৰ নেতা ৰাহুল গান্ধীৰ নামৰ অপব্যৱহাৰ হোৱাৰ পিছত কংগ্ৰেছ দলে ইয়াৰ তীব্ৰ বিৰোধিতা কৰিছে।
চহৰখনৰ চিভিল লাইনছ অঞ্চলত অৱস্থিত ৰেষ্টুৰেণ্টখনে ইটালীৰ পাস্তা, মেক্সিকান পাস্তা আৰু হেংঅ'ভাৰ পাস্তাকে ধৰি ইটালীৰ বহু সুস্বাদু খাদ্য পৰিৱেশন কৰি আহিছে৷
এই খাদ্যবোৰ "ইটালিয়ান ৰাহুল গান্ধী" শ্ৰেণীৰ অধীনত তালিকাভুক্ত কৰা হৈছে। লক্ষণীয়ভাৱে, ৰাহুলে প্ৰায়ে আইতাকক লগ কৰিবলৈ ইটালী ভ্ৰমণ কৰে। ইটালীৰ প্ৰতি থকা ৰাহুলৰ মৰমৰ বাবেই হয়তো খাদ্যৰ নামত ৰাহুলৰ নাম সংযোগ কৰা হৈছে।
ইটাৱা জিলা কংগ্ৰেছ সমিতিয়ে মেনু কাৰ্ডখন তৎক্ষণাৎ আঁতৰ নকৰিলে আৰু ৰেষ্টুৰেণ্টখনে ক্ষমা নিবিচাৰিলে আন্দোলন কৰাৰ ভাবুকি দিছে।
ইটাৱা জিলা কংগ্ৰেছ সমিতিৰ সদস্যসকলে জ্যেষ্ঠ আৰক্ষী অধীক্ষকক এই সন্দৰ্ভত এখন পত্ৰ প্ৰদান কৰে। কংগ্ৰেছৰ প্ৰতিবাদৰ পিছতে জ্যেষ্ঠ আৰক্ষী অধীক্ষকে উপযুক্ত ব্যৱস্থা গ্ৰহণৰ প্ৰতিশ্ৰুতি দিয়া বুলি জানিব পৰা গৈছে।
Continue Reading
