ডিজিটেল ডেস্কঃ আদালতে পুনৰ সকাহ দিলে কংগ্ৰেছ নেতা ৰাহুল গান্ধীক। নিৰ্বাচনত দুয়োখন আসনতে ভাল ফলাফল প্ৰদৰ্শন কৰাৰ পিছত এইবাৰ আদালতৰ পৰাও ভাল খবৰ পালে কংগ্ৰেছ নেতা ৰাহুল গান্ধীয়ে। বাংগালুৰুৰ বিশেষ আদালতত মানহানিৰ গোচৰত জামিন লাভ কৰিলে কংগ্ৰেছ সাংসদগৰাকীয়ে । কৰ্ণাটকৰ উপ-মুখ্যমন্ত্ৰী ডি কে শিৱকুমাৰৰ ভাতৃ ডি কে সুৰেশে দিয়া বণ্ডত ৰাহুলে জামিন লাভ কৰিলে । ২০২৩ চনৰ মে’ মাহত কৰ্ণাটক বিধানসভা নিৰ্বাচনৰ পূৰ্বে প্ৰচাৰ চলাই থকাৰ সময়তে ৰাহুলে অভিযোগ কৰিছিল যে শাসকীয় বিজেপি চৰকাৰে চৰকাৰী কামৰ বাবে ৪০ শতাংশ কমিচন আদায় কৰি আহিছে।
লগতে ৰাহুলে বাসৱৰাজ চৰকাৰক ৪০ শতাংশ চৰকাৰ বুলিও ঠাট্টা-মস্কৰা কৰিছিল। কংগ্ৰেছ নেতাগৰাকীৰ এনে মন্তব্যৰ বিৰুদ্ধে আদালতলৈ গৈছিল বিজেপিৰ সাধাৰণ সম্পাদক কেশৱ প্ৰসাদে। সেই গোচৰত ৰাহুলক শুকুৰবাৰে বাংগালুৰুৰ বিশেষ আদালতত হাজিৰ হ’বলৈ নিৰ্দেশ দিয়া হৈছিল। কৰ্ণাটকৰ নিম্ন আদালতে ৰাহুলক হাজিৰ হোৱাৰ লগে লগে জামিন মঞ্জুৰ কৰে।
এই গোচৰৰ পৰৱৰ্তী শুনানি ৩০ জুলাইত হ’ব। ৰাহুল গান্ধীৰ উপৰি কৰ্ণাটকৰ মুখ্যমন্ত্ৰী সিদ্ধাৰমাইয়া আৰু উপ-মুখ্যমন্ত্ৰী ডি কে শিৱকুমাৰৰ বিৰুদ্ধেও বিজেপিয়ে গোচৰ ৰুজু কৰিছিল। অৱশ্যে ১ জুনত অতিৰিক্ত মুখ্য মহানগৰ দণ্ডাধীশৰ সন্মুখত হাজিৰ হৈছিল দুয়োগৰাকী নেতা। একেদিনাই তেওঁলোককো গোচৰটোত জামিন মঞ্জুৰ কৰা হৈছিল।
Continue Reading
